Россия Москвадаги АҚШ элчихонасининг ўн нафар ходимини persona non grata мақомидаги шахслар деб эълон қилди. Россия ТИВ мазкур нотани АҚШ элчисининг ўринбосари Барт Горманга топширган.
Дипломатлар 21 майга қадар Россия ҳудудидан чиқиб кетиши шарт. Ташқи ишлар вазирлиги мазкур чоранинг Вашингтондаги элчихона ва Нью-Йоркдаги консулликда россиялик дипломатларга нисбатан қўлланилган душманона сиёсат, уларнинг асоссиз равишда persona non grata шахслари деб эълон қилинганига жавоб сифатида қўлланилганини қайд этган.
Шунингдек, Москванинг навбатдаги чиқишида яқин вақт ичида АҚШ томонидан эълон қилинган янги санкцияларга нисбатан Россия ТИВ 16 апрелда эълон қилган баёнотда қайд этилган кескин жавоб чоралари амалга оширилиши ҳам баён қилинган.
20 апрелда АҚШнинг Россиядаги элчиси Жон Салливаннинг тез орада Вашингтонга қайтиб кетиши маълум қилинганди. Мазкур қарор Россия президентининг ёрдамчиси Юрий Ушаковнинг элчига АҚШ пойтахтига бориш ҳамда янги санкциялардан кейин юзага келган кескинликни камайтириш учун жиддий маслаҳатлашувлар ўтказишни тавсия қилганидан кейин чиқарилган.
Россиянинг Вашингтондаги элчиси Анатолий Антонов март ойи ўрталарида мамлакатга чақириб олинган. Ушбу ҳодиса АҚШ президенти Жо Байденнинг журналистларга берган интервьюсида ҳамкасби Владимир Путинни қотил деб ҳисоблаш ёки ҳисобламаслиги ҳақидаги саволга «ҳа», деб жавоб берганидан кейин содир бўлган.
Россиянинг ташқи сиёсатида Польша, Болгария ҳамда Чехия билан муносабатларда ҳам кескинлик кузатилмоқда. Чехия 18 нафар россиялик дипломатни қайтариб юборишини билдирганидан кейин Россия ҳам 20 нафар чехиялик дипломатни Москвадан чиқариб юборган.
Шунингдек, Болгарияда икки нафар россиялик дипломат жосусликда гумон қилиниб, Россияга қайтариб юборилгач, Россия икки нафар болгариялик дипломатни мамлакатдан чиқариб юборган.
Изоҳ (0)