Оксфорд университети 19 апрель куни COVID-19 билан касалланган 18 ёшдан 30 ёшгача бўлган кўнгиллиларга SARS-CoV-2 вирусини қайта юқтириш бўйича тадқиқот лойиҳаси бошланганини эълон қилди. Бу ҳақда Meduza хабар берди.

Фото: Getty Images

Хабарга кўра, иммунитет реакциясининг қайси даражаси қайта инфекцияланишнинг олдини олишини ва иммунитет иккинчи марта вирусга қандай таъсир қилишини аниқлаш учун ушбу тадқиқотларни инсонларда ўтказиш зарур. Кўнгиллилар эмланмаган ва COVID-19’га қарши антитаналарга эга бўлиши керак. Шунингдек, улар тажриба бошлангунига қадар касалликдан бутунлай соғайган бўлиши керак.

Университет маълумотларига кўра, тадқиқот икки босқичда амалга оширилиб, ҳар бирида иштирокчиларнинг турли гуруҳлари қатнашади. 2021 йил апрелида бошланадиган биринчи босқичда кўнгиллилар коронавируснинг «минимал дозаси»ни юқтиради. Тадқиқотчилар вирусни қайта юқтириш иштирокчиларнинг камида 50 фоизида касаллик симптомларини келтириб чиқармаслиги ёки жуда кам миқдорда келтириб чиқариши керак, деб кутмоқда.

Ушбу босқич учун Оксфорд университетига 18 ёшдан 30 ёшгача бўлган 64 нафар кўнгилли керак бўлади. Тадқиқотда Хитойнинг Ухань шаҳридан олинган асл коронавирусдан фойдаланилади. Иштирокчилар махсус тайёрланган касалхонада камида 17 кун карантинга олинади. Улар кўплаб текширувлардан, шу жумладан, ўпка томографиясидан ва юрак МРTсидан ўтади.

2021 йилнинг ёзида бошланиши кутилаётган иккинчи босқичда барча иштирокчиларга вируснинг «стандартлаштирилган дозаси» юқтирилади, унинг ҳажми биринчи босқичда белгиланиши режалаштирилган. Тадқиқотнинг умумий давомийлиги 12 ой.

Университет иштирокчилар учун хатарлар «минималлаштирилиши» ва ҳар қандай аломат пайдо бўлган барча кўнгиллиларга Американинг Regeneron Pharmaceuticals компаниясида ишлаб чиқариладиган моноклонал антитана муолажаси буюрилишини ваъда қилди. Аввалроқ АҚШда ушбу доридан коронавирусни даволаш учун касалхоналарда фойдаланиш тасдиқланган.

Лойиҳа раҳбари Ҳелен Макшейннинг таъкидлашича, бу каби тадқиқотлар жуда муҳим, чунки уларда табиий муҳитда юқадиган вирусдан фарқли ўлароқ инфекция қатъий назорат остида бўлади. «Биз ушбу кўнгиллиларга вирусни қайта юқтирганимизда, уларнинг иммунитети биринчи инфекцияга қандай таъсир қилганини, айнан қачон қайта инфекцияланиш содир бўлганини ва қанча вирус олганини аниқ билиб оламиз. Буларнинг ҳаммасини яхшироқ тушуниш билан бир қаторда, бу бизга вирусга чалинган кишиларнинг касаллик такрорланишидан ҳимояланганми ёки йўқлигини аниқ айта оладиган тестларни ишлаб чиқишда ёрдам беради», — дея қўшимча қилди Макшейн. Бундан ташқари, тадқиқот янада самарали вакциналар ва даволаш усулларини ишлаб чиқишга, шунингдек, одамларни қайта инфекцияланишдан қандай қилиб ва қанча муддат ҳимоя қилинишини тушунишга имкон бериши керак.

2021 йил февраль ойида Буюк Британия коронавирусни инсонларда ўтказиладиган тажриба орқали ўрганишга рухсат берган дунёдаги биринчи мамлакат бўлгани ҳақида Reuters хабар берган. Лондондаги Империал коллежида илгари коронавирусга чалинмаган одамларга инфекцияни атай юқтирувчи яна бир тадқиқот бошланган: 25 март куни коллеж биринчи уч нафар юқтирилган кўнгилли аллақачон карантиндан чиққани ва уларнинг барчаси соғлом экани ҳақида маълум қилди. Эндиликда тадқиқотчилар синовнинг кейинги босқичига ўтган, улар бурун йўлида кўпайиш учун зарур бўлган вируснинг энг паст дозасини аниқлаш учун 18 ёшдан 30 ёшгача бўлган янги соғлом кўнгиллиларни йиғмоқда.