Oksford universiteti koronavirusdan tuzalgan ko‘ngillilarga virusni qayta yuqtirishni boshlaydi. Bu kasallikka nisbatan immunitet qanday ishlashini tushunish uchun kerak

Oksford universiteti 19-aprel kuni COVID-19 bilan kasallangan 18 yoshdan 30 yoshgacha bo‘lgan ko‘ngillilarga SARS-CoV-2 virusini qayta yuqtirish bo‘yicha tadqiqot loyihasi boshlanganini e’lon qildi. Bu haqda Meduza xabar berdi.

Xabarga ko‘ra, immunitet reaksiyasining qaysi darajasi qayta infeksiyalanishning oldini olishini va immunitet ikkinchi marta virusga qanday ta’sir qilishini aniqlash uchun ushbu tadqiqotlarni insonlarda o‘tkazish zarur. Ko‘ngillilar emlanmagan va COVID-19’ga qarshi antitanalarga ega bo‘lishi kerak. Shuningdek, ular tajriba boshlanguniga qadar kasallikdan butunlay sog‘aygan bo‘lishi kerak.

Universitet ma’lumotlariga ko‘ra, tadqiqot ikki bosqichda amalga oshirilib, har birida ishtirokchilarning turli guruhlari qatnashadi. 2021-yil aprelida boshlanadigan birinchi bosqichda ko‘ngillilar koronavirusning “minimal dozasi”ni yuqtiradi. Tadqiqotchilar virusni qayta yuqtirish ishtirokchilarning kamida 50 foizida kasallik simptomlarini keltirib chiqarmasligi yoki juda kam miqdorda keltirib chiqarishi kerak, deb kutmoqda.

Ushbu bosqich uchun Oksford universitetiga 18 yoshdan 30 yoshgacha bo‘lgan 64 nafar ko‘ngilli kerak bo‘ladi. Tadqiqotda Xitoyning Uxan shahridan olingan asl koronavirusdan foydalaniladi. Ishtirokchilar maxsus tayyorlangan kasalxonada kamida 17 kun karantinga olinadi. Ular ko‘plab tekshiruvlardan, shu jumladan, o‘pka tomografiyasidan va yurak MRTsidan o‘tadi.

2021-yilning yozida boshlanishi kutilayotgan ikkinchi bosqichda barcha ishtirokchilarga virusning “standartlashtirilgan dozasi” yuqtiriladi, uning hajmi birinchi bosqichda belgilanishi rejalashtirilgan. Tadqiqotning umumiy davomiyligi 12 oy.

Universitet ishtirokchilar uchun xatarlar “minimallashtirilishi” va har qanday alomat paydo bo‘lgan barcha ko‘ngillilarga Amerikaning Regeneron Pharmaceuticals kompaniyasida ishlab chiqariladigan monoklonal antitana muolajasi buyurilishini va’da qildi. Avvalroq AQShda ushbu doridan koronavirusni davolash uchun kasalxonalarda foydalanish tasdiqlangan.

Loyiha rahbari Helen Maksheynning ta’kidlashicha, bu kabi tadqiqotlar juda muhim, chunki ularda tabiiy muhitda yuqadigan virusdan farqli o‘laroq infeksiya qat’iy nazorat ostida bo‘ladi. “Biz ushbu ko‘ngillilarga virusni qayta yuqtirganimizda, ularning immuniteti birinchi infeksiyaga qanday ta’sir qilganini, aynan qachon qayta infeksiyalanish sodir bo‘lganini va qancha virus olganini aniq bilib olamiz. Bularning hammasini yaxshiroq tushunish bilan bir qatorda, bu bizga virusga chalingan kishilarning kasallik takrorlanishidan himoyalanganmi yoki yo‘qligini aniq ayta oladigan testlarni ishlab chiqishda yordam beradi”, — deya qo‘shimcha qildi Maksheyn. Bundan tashqari, tadqiqot yanada samarali vaksinalar va davolash usullarini ishlab chiqishga, shuningdek, odamlarni qayta infeksiyalanishdan qanday qilib va qancha muddat himoya qilinishini tushunishga imkon berishi kerak.

2021-yil fevral oyida Buyuk Britaniya koronavirusni insonlarda o‘tkaziladigan tajriba orqali o‘rganishga ruxsat bergan dunyodagi birinchi mamlakat bo‘lgani haqida Reuters xabar bergan. Londondagi Imperial kollejida ilgari koronavirusga chalinmagan odamlarga infeksiyani atay yuqtiruvchi yana bir tadqiqot boshlangan: 25-mart kuni kollej birinchi uch nafar yuqtirilgan ko‘ngilli allaqachon karantindan chiqqani va ularning barchasi sog‘lom ekani haqida ma’lum qildi. Endilikda tadqiqotchilar sinovning keyingi bosqichiga o‘tgan, ular burun yo‘lida ko‘payish uchun zarur bo‘lgan virusning eng past dozasini aniqlash uchun 18 yoshdan 30 yoshgacha bo‘lgan yangi sog‘lom ko‘ngillilarni yig‘moqda.