NASDAQ биржасида Tesla акциялари нархи 19 апрель куни 6,5 фоизга пасайиб, 691,96 долларни ташкил этди. Қимматли қоғозлар бир кун олдинги савдо кунини 739,78 доллар билан ёпган эди. Тошкент вақти билан 20:30 га қадар акция нархи 713,8 долларга тенглашган.
Bloomberg хабарига кўра, акциялар баҳоси Техасда Tesla S электрокар билан юз берган автоҳалокатдан кейин тушиб кетди. Штатнинг Вудлендс шаҳрида Tesla электромобилининг катта тезликда дарахтга урилиши натижасида икки киши ҳалок бўлган эди, уларнинг бири машинанинг олд ўриндиғида, иккинчиси эса орқа ўриндиқда бўлган. Катта тезликда ҳаракатланаётган автомобиль бурилишга улгурмай, дарахтга урилиб, ёниб кетган.
Полиция автомобиль бошқарувида ҳеч ким бўлмагани, ҳаракат чоғида автопилот функцияси ёқилганми ёки йўқлиги ҳали маълум эмаслигини айтган.
Autopilot ёки Full Self-Driving (FSD) функцияси бу ҳозирда Tesla’нинг кенгайтирилган пакетида 10 минг долларга сотилаётган автоматлаштирилган ҳайдаш тизимидир. Бу функция фақат ҳайдовчининг ёрдамчиси вазифасини ўтайди ва автомобилнинг тўлиқ ўзини ўзи бошқаришини таъминламайди.
Кейинроқ Илон Маск Техасда аварияга учраган Tesla электромобилида автопилот функцияси ёқилмаганини маълум қилди.
«Ҳозирга қадар олинган маълумотлар автопилот ёқилмагани ва ушбу автомобиль учун тўлиқ автоматлаштирилган ҳайдаш тизими сотиб олинмаганини кўрсатмоқда»— , деб ёзди Маск Twitter’да.
Автоҳалокатдан сўнг Tesla акциялари нархи тушгача Forbes рейтингига кўра, Маскнинг бойлиги 5,1 миллиард долларга камайди. 20 апрель куни эрталаб унинг бойлиги 174,6 миллиард долларни ташкил этди. Маск дунёдаги энг бой одамлар рўйхатида учинчи ўринда туради.
Изоҳ (0)