Германия канцлери Ангела Меркель Россия президенти Владимир Путин билан шахсий суҳбатлар чоғида уни очиқчасига танқид қилиши ва баъзи масалаларда у билан ҳамфикр эмаслигини маълум қилди. Бу ҳақда «ТАСС» хабар берди.
20 апрель куни Европа Кенгаши Парламент ассамблеясининг баҳорги сессияси иштирокчиларига видеоалоқа орқали мурожаати ва иштирокчилардан бирининг сиз ҳам Путинни ‘қотил’ деб биласизми, деган саволига жавоб берар экан Меркель шундай деди:
«Владимир Путинга келсак, у ҳақда ўз сўзларим билан жавоб бераман: Путинни танқид қилишимни яширмайман, аммо фақатгина шахсий суҳбатлар мобайнида танқид қиламан».
Меркель «мен Россияда юз бераётган воқеаларнинг ҳаммасига ҳам тарафдорлик қилмайман » дея таъкидлаб, авваламбор, инсон ҳуқуқларига риоя қилиш муаммосига ишора қилди. «Мен Навальний мавзусини аллақачон айтиб ўтган эдим, аммо яна кўплаб мавзуларни ҳам санаб ўтишим мумкин», — дея қўшимча қилди у.
Шу билан бирга, Меркель барча тафовутларга қарамай Россия билан мулоқот муҳим эканини таъкидлади.
Апрель ойи бошида Путин ва Ангела Меркель телефон орқали суҳбатлашган эди. Суҳбат чоғида томонлар Навальний масаласини муҳокама қилди. Германия канцлери Россия қўшинларининг бир қисмини Украина чегарасидан олиб кетишга чақирди. Ундан аввал Ангела Меркель ва Франция президенти Эммануэль Макрон Путин билан видеоконференцалоқа орқали музокаралар ўтказди. Улар Путиндан Навальнийнинг «соғлиғини асраш»ни илтимос қилди.16 апрель куни Макрон, Ангела Меркель ва Украина президенти Владимир Зеленский уч томонлама учрашув якунида Донбассдаги можаронинг авж олишига йўл қўймаслик учун Россия ўз қўшинларини Украина билан чегарадан олиб кетиши кераклигини айтганди.
Бунгача ҳам Байден ва Меркель Россияни Украина билан чегарадаги қўшинларини олиб кетишга чақирган.
Изоҳ (0)