Фарғонада сохта ПЦР-тест маълумотномаси ва Россияда даволаниш учун таклифнома сотиш билан шуғулланган шахс қўлга олинди

ДХХ ва ИИВ ходимлари томонидан Фарғонада ўтказилган тезкор тадбирда сохта ПЦР-тест маълумотномаси ва Россияда даволаниш учун таклифнома савдоси билан шуғулланган шахс қўлга олинди, деб хабар бермоқда ЎзА.

Маълум қилинишича, Андижон шаҳрида яшовчи 1996 йилда туғилган И.С. Фарғона халқаро аэропорти олдида маҳаллий фуқаро билан учрашиб, унга ўзини сайёҳлик фирмаси ходими сифатида таништиради ҳамда унга Россияга кетишига ёрдам беришини айтган.

У фуқаронинг жўнаб кетишида зарур бўладиган авиачипта, Россиянинг тиббий муассасаларида даволаниш учун таклифнома ҳамда коронавирус касаллиги аниқланмаганлиги тўғрисида ПЦР-тест маълумотномасини тайёрлаб беришини маълум қилган ва хизмати эвазига 1200 доллар сўраган.

И.С. ушбу фуқаро номига қалбаки равишда тайёрланган Россия тиббий муассасаларида даволаниш учун таклифнома ва ПЦР-тест маълумотномасини бериб, ундан 1100 доллар олган вақтида ашёвий далиллар билан ушланган.

Ҳозирда И.С.га нисбатан Жиноят кодексининг 168 (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари олиб борилмоқда.

Аввалроқ Бош прокуратура ҳузуридаги Департамент ҳамда ДХХ томонидан Наманган вилоятида ўтказилган тезкор тадбирда икки фуқарони Россияга қалбаки ҳужжатлар орқали юбормоқчи бўлган шахслар ушлангани ҳақида хабар берилган эди.

Эслатиб ўтамиз, Ўзбекистонда апрель ойидан бошлаб, ҳар шанба куни Тошкент—Москва—Тошкент йўналиши бўйича мунтазам авиақатновлар қайта жорий этилди. Ушбу хабардан сўнг Россияга учувчи самолёт чипталарига талаб 165 фоизга ўсганди.

Транспорт вазирлиги ижтимоий тармоқларда Россияга Ўзбекистоннинг турли ҳудудларидан чартер қатновлари амалга оширилиши тўғрисидаги ёлғон хабарлар тарқатилиб, фуқароларга алдов ва товламачилик йўли билан чипталар сотувини ташкил этаётган гуруҳларнинг фаоллашгани кузатилаётганини маълум қилганди.

Вазирлик фуқаролардан бу каби ёлғон хабарларга ишониб, алданиб қолишларининг олдини олиш мақсадида чартер рейсларини амалга оширувчи авикомпанияларнинг парвозни бажаришига рухсат этилгани тўғрисидаги маълумотларни Фуқаро авиацияси агентлиги расмий веб-сайтидан аниқлаштириб олишни тавсия этган.