Наманганда 32 ёшли йигитнинг ножўя кўринишдаги фотоларини тарқатиш билан таҳдид қилиб, ундан 20 миллион сўм талаб қилган шахслар қўлга олинди. Бу ҳақда «Дарё»га вилоят ИИБ ахборот хизмати маълум қилди.
Воқеа 2021 йил 8 апрель куни Янгиқўрғон туманида содир бўлди. Ушбу туманда яшовчи, 1989 йилда туғилган фуқаронинг хонадонига Чортоқ туманида истиқомат қилувчи икки таниши меҳмон бўлиб келади. Улар биргаликда спиртли ичимлик истеъмол қилиб, мезбоннинг маст бўлиб қолганидан фойдаланган меҳмонлар қалтис ҳазилга қўл уради: йигитнинг эгнидаги барча кийимларини ечиб олиб, телефонларида тасвирга олади. Лавҳада хонадонда сақлаб келинаётган қуритилган укроп ва ошкўк гиёҳванд моддалар сифатида талқин қилинади.
Мезбон ўзига келганида оғайнилари ундан ушбу видеотасвирни интернет тармоғи орқали тарқатиб, шарманда қилиш билан қўрқитади. Бундай қилмаслик эвазига эса 20 миллион сўм талаб қилади.
Жабрланувчи мазкур ҳолат юзасидан 13 апрель куни ички ишлар идораларига мурожаат қилди. Вилоят ИИБ Жиноят-қидирув бошқармаси ходимлари томонидан ўтказилган тадбир давомида Наманган шаҳридаги Ҳамроҳ кўчасида аризада номи келтирилган шахслар фуқародан махсус кимёвий ишлов берилган 20 миллион сўмни олган пайтда тезкор тадбир иштирокчилари томонидан ушланди.
Наманган шаҳар Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан 15 апрель куни ушбу ҳолат юзасидан Жиноят кодексининг 165-моддаси 2-қисми билан жиноят иши қўзғатилди. Ҳозирда суриштирув ишлари олиб борилмоқда.
Бундан аввал Самарқандда эркакнинг ўзга аёл билан ёзишмаларини хотинига кўрсатмаслик эвазига 14 миллион сўм талаб қилган аёл ушлангани, Самарқанддаги ресторанда 1 миллион сўмга овқатланиб, пул тўламасдан кетган шахснинг телефон ва пулларини олиб қўйган официантга нисбатан жиноий иш қўзғатилгани, Самарқандда 21 ёшли қизнинг шахсий суратларини тарқатиб юбормаслик эвазига 400 доллар сўраган институт ўқитувчиси ушлангани ҳамда Тошкент вилоятида танишининг суратларини интернетда тарқатиш билан қўрқитиб, ундан 5 миллион сўм талаб қилган нигериялик ушлангани ҳақида хабар берилганди.
Изоҳ (0)