DXX va IIV xodimlari tomonidan Farg‘onada o‘tkazilgan tezkor tadbirda soxta PZR-test ma’lumotnomasi va Rossiyada davolanish uchun taklifnoma savdosi bilan shug‘ullangan shaxs qo‘lga olindi, deb xabar bermoqda O‘zA.
Ma’lum qilinishicha, Andijon shahrida yashovchi 1996-yilda tug‘ilgan I.S. Farg‘ona xalqaro aeroporti oldida mahalliy fuqaro bilan uchrashib, unga o‘zini sayyohlik firmasi xodimi sifatida tanishtiradi hamda unga Rossiyaga ketishiga yordam berishini aytgan.
U fuqaroning jo‘nab ketishida zarur bo‘ladigan aviachipta, Rossiyaning tibbiy muassasalarida davolanish uchun taklifnoma hamda koronavirus kasalligi aniqlanmaganligi to‘g‘risida PZR-test ma’lumotnomasini tayyorlab berishini ma’lum qilgan va xizmati evaziga 1200 dollar so‘ragan.
I.S. ushbu fuqaro nomiga qalbaki ravishda tayyorlangan Rossiya tibbiy muassasalarida davolanish uchun taklifnoma va PZR-test ma’lumotnomasini berib, undan 1100 dollar olgan vaqtida ashyoviy dalillar bilan ushlangan.
Hozirda I.S.ga nisbatan Jinoyat kodeksining 168 (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari olib borilmoqda.
Avvalroq Bosh prokuratura huzuridagi Departament hamda DXX tomonidan Namangan viloyatida o‘tkazilgan tezkor tadbirda ikki fuqaroni Rossiyaga qalbaki hujjatlar orqali yubormoqchi bo‘lgan shaxslar ushlangani haqida xabar berilgan edi.
Eslatib o‘tamiz, O‘zbekistonda aprel oyidan boshlab, har shanba kuni Toshkent—Moskva—Toshkent yo‘nalishi bo‘yicha muntazam aviaqatnovlar qayta joriy etildi. Ushbu xabardan so‘ng Rossiyaga uchuvchi samolyot chiptalariga talab 165 foizga o‘sgandi.
Transport vazirligi ijtimoiy tarmoqlarda Rossiyaga O‘zbekistonning turli hududlaridan charter qatnovlari amalga oshirilishi to‘g‘risidagi yolg‘on xabarlar tarqatilib, fuqarolarga aldov va tovlamachilik yo‘li bilan chiptalar sotuvini tashkil etayotgan guruhlarning faollashgani kuzatilayotganini ma’lum qilgandi.
Vazirlik fuqarolardan bu kabi yolg‘on xabarlarga ishonib, aldanib qolishlarining oldini olish maqsadida charter reyslarini amalga oshiruvchi avikompaniyalarning parvozni bajarishiga ruxsat etilgani to‘g‘risidagi ma’lumotlarni Fuqaro aviatsiyasi agentligi rasmiy veb-saytidan aniqlashtirib olishni tavsiya etgan.
Izoh (0)