АҚШнинг Огайо штати Колумбус шаҳрида полиция ходими 16 ёшли қора танли қизни отиб ўлдирди. Бунга жавобан полиция биноси олдида намойишчилар тўпланишни бошлади, деб ёзади «РБК».
Маҳаллий 10TV телеканалининг хабар беришича, 20 апрель куни тартиб бузилгани тўғрисидаги хабар билан ҳодиса жойига полиция чақирилган. Марҳум Макая Брайантнинг оиласи уйи олдида қизлар муштлашиб кетгани сабабли полицияни ёрдамга чақирган. Марҳумнинг холаси жиянининг қўлида пичоқ бўлганини айтди. Аммо у пичоқни жанжал пайтида ўзини ҳимоя қилиш учун қўлига олганди, дейди аёл.
Полиция ўқидан оғир жароҳат олган Брайант касалхонада вафот этди. У қай тарзда отиб ташлангани ҳақида аниқ маълумот берилмаган. Колумб мэри Эндрю Жинтер Twitter’да «ёш қиз фожиали тарзда ҳалок бўлди» деб ёзди, аммо тафсилотларни келтирмади. Унинг айтишича, ҳодиса полициячининг боди-камерасига ёзиб олинган.
«Мен аҳолидан тинчлик сақлашни ва Тергов бюросига фактларни йиғишига рухсат беришни илтимос қиламан», — деб ёзди шаҳар мери Twitter’да. Бироқ 10TV телеканали хабарига кўра, аллақачон намойишчилар полиция бўлими олдида тўпланиб, марҳум қизнинг исмини айтиб бақиришни бошлаган.
https://twitter.com/Qwolnosci/status/1384657867081461761
Қайд этилишича, ушбу ҳодиса тахминан қора танли америкалик Жорж Флойдни бўғиб ўлдирган собиқ полициячига ҳукм эълон қилинган вақтда содир бўлган. Суд ҳайъати Миннеаполис шаҳрининг собиқ полициячиси Дерек Шовинни афроамерикалик Жорж Флойдни эҳтиётсизлик орқасида одам ўлдиришда айбдор деб топди. Суддан кейин Шовин Миннесота штатидаги Оук-Парк-Хайтс ахлоқ тузатиш муассасасига жойлаштирилди.
Маълумот учун, АҚШнинг Миннесота штатидаги Бруклин-Сентер шаҳрида яна бир қора танли йигит полициячилар томонидан ҳибсга олиниш пайтида ўлдирилди. Шундан сўнг шаҳарда норозилик намойишлари бошланган. Шунингдек, АҚШда полициячи шифохонага ётқизилган қора танли эркакни отиб қўйган эди.
Изоҳ (0)