Путиннинг мурожаати ва норозилик акцияси арафасида Москвадаги Манеж майдонига тўсиқлар ўрнатилди

Россия пойтахти Москвадаги Манеж майдонига металл тўсиқлар ўрнатилди. Бу ҳақда «Дожд» телеканалига таяниб, Meduza хабар берди.

Хабарга кўра, Россия президенти Владимир Путин 21 апрель куни Манежда Федерал Мажлисга мурожаат йўллайди. Шунингдек, Москва мэриясига ушбу санада Манеж майдонида Алексей Навальнийни қўллаб-қувватловчи акция ўтказиш ҳақида ариза келиб тушган. Шаҳар ҳокимияти бунга розилик бермади.

ОАВ манбаларининг хабар беришича, Москвадаги акция куни Кремлга туташ барча асосий кўчалар ва майдонлар тўсиб қўйилади. Бошқа шаҳарларда ҳам расмийлар турли важлар билан асосий кўчаларни тўсиб қўйишга қарор қилди. Масалан, Костромада бу марказий ва бошқа майдонлардаги ҳаракат зонасини қайта ишлаб чиқиш, Екатеринбургда эса ҳарбий парад учун машқ қилиш билан изоҳланди. Шунингдек, Санкт-Петербургдаги Невский проспектида ва Сарой майдонида ҳам тўсиқлар ўрнатилди.

Аввалроқ москвалик олим Навальний билан бирдамлик белгиси сифатида очлик эълон қилган эди. Ўнлаб одамлар уни қўллаб-қувватлаган. Олим ўз ҳаракатининг асосий мақсади колониядаги Навальнийни шифокор текширувдан ўтказишга ва унга малакали тиббий ёрдам кўрсатишга чақириш эканини таъкидлаган.

31 март куни Навальний очлик эълон қилган эди. У бели ва оёғида оғриқ зўрайгани, аммо унга керакли дорилар берилмагани ва шифокорлар юборилмагани сабабли шундай қарорга келганини айтган.

The New York Times таҳририяти Россия президенти Владимир Путинга мухолифатчи Алексей Навальнийни шифокор кўригидан ўтказиш, унинг аҳволи қай даражада оғирлигини баҳолаш ва агар зарур бўлса, сиёсатчини интенсив терапияга юбориш сўрови билан мурожаатнома эълон қилди. «Агар Путин Навальнийнинг колонияда ўлишига қўйиб берса, ‘қотил’ деган номни оқлаган бўлади», — деди мурожаат муаллифлари.