Украина президенти Владимир Зеленский россиялик ҳамкасби Владимир Путинни Донбассда учрашишга таклиф қилди. Зеленский ўзининг Telegram каналига жойлаштирилган видеомурожаатида мазкур таклиф билан чиқди, деб ёзади «РБК».
Зеленский 19 апрель куни бўлиб ўтган «Нормандия тўртлиги» сиёсий маслаҳатчиларининг учрашувида вазиятни максимал даражада кўздан кечириш ва тушуниш учун Донбассдаги алоқа линиясида учрашув ўтказиш таклифи илгари сурилганини таъкидлади.
«Мен яна нимани тушунишим керак? Менга ҳаммаси кундек равшан, у ерга ҳар ойда бораман. Жаноб Путин, мен яна боришга ва сизни уруш давом этаётган Украинанинг Донбасс ҳудудидаги исталган нуқтада учрашишга таклиф қилишга тайёрман», — деди Зеленский.
Унинг сўзларига кўра, Украина ва Россия ўртасида уруш юз берса, охир-оқибат иккала томон ҳам ютқазади. Шунингдек, Украина президенти «танкда тинчлик ўрнатиш мумкин эмас», деб қўшимча қилди.«Бир сафар Россия президенти айтган эди: агар жанг муқаррар бўлса, биринчи бўлиб зарба бериш керак. Аммо, менинг фикримча, бугунги кунда кўча жанги ва безорилар ҳақида эмас, балки ҳақиқий уруш ҳақида гап кетганда, ҳар бир етакчи кураш муқаррар бўлиши мумкин эмаслигини тушуниши керак. Сиз кимнидир ҳужум қилиб ҳимоя қила олмайсиз. Ва қўлга олиш орқали кимнидир озод қилиш мумкин эмас», — деди Зеленский.
Унинг фикрига кўра, Украина ва Россия умумий ўтмишига қарамай, «келажакка бошқача кўз билан қарайди». «Биз бу биз. Сиз эса сиз. Аммо албатта, бу муаммо эмас, балки имкониятдир», — дея мурожаатини якунлаган Украина президенти.
Март ойининг охирида бутун дунё Донбассдаги вазиятнинг жиддийлашаётгани ҳақида гапира бошлади. Conflict Intelligence Team суриштирув гуруҳи Россия қўшинларининг Россия—Украина чегараси ҳудудида тўпланишини 2014—2015 йиллардан бери энг кескин кўрсаткич деб атади. Киев ўз чегаралари яқинида рус қўшинлари тўпланганини тасдиқлади ва уни «ўз кучини кўз-кўз қилиш» деб атади. АҚШ Россиядан мазкур «провокациялар»га изоҳ беришни талаб қилди.
Маълумот учун, Буюк Британия май ойида Украина ва НАТО бўйича шериклари билан бирдамлик ва уларни қўллаб-қувватлаш рамзи сифатида минтақада Россия қўшинларининг кўпайтирилиши фонида Қора денгизга иккита ҳарбий кема юборишни режалаштирмоқда.
Аввалроқ Франция президенти Эммануэль Макрон, Германия канцлери Ангела Меркель ва Украина президенти Владимир Зеленский Донбассдаги можаронинг авж олишига йўл қўймаслик учун Россия ўз қўшинларини Украина билан чегарадан олиб кетиши кераклигини айтганди.
Шунингдек, Байден ва Ангела Меркель Россияни Украина билан чегарадаги қўшинларини олиб кетишга чақирган эди. Унгача Россия Украина чегарасига ва Қримга 40 минг нафардан аскар жўнатгани ҳақида хабар берилган. Украина президенти Владимир Зеленский Россияни «жиловлаш»да Байдендан ёрдам сўраган. Кремль эса Россия ва Украина ўртасидаги уруш эҳтимолини истисно қилган.
Изоҳ (0)