«Агар Россия демократиямиз йўлида ғов бўлаверса, бундан кейинги чораларни кўришга ҳам тайёрман» — Жо Байден Россияга қарши санкциялар ҳақида

АҚШ президенти Жо Байден Россия ҳукуматининг «зарарли ташқи ҳаракатлари» туфайли унга қарши санкциялар жорий қилгандан сўнг, 15 апрель куни Россия ҳақида баёнот чиқарди. Бу ҳақда Meduza хабар берди.

«Агар Россия бизнинг демократиямизга аралашишда давом этса, мен бунга жавобан кейинги чораларни кўришга тайёрман. Бу менинг АҚШ президенти сифатидаги вазифам», — деди Байден Оқ уйдаги баёнотида.

Шунингдек, Байден Россия томонидан кутилаётган таҳдид туфайли фавқулодда вазият режимини эълон қилди.

«Мен Россия маъмуриятининг олиб бораётган зарарли фаолиятини, хусусан, АҚШда эркин ва адолатли сайловлар ўтказилишига путур етказувчи ҳаракатларини АҚШ миллий хавфсизлиги, ташқи сиёсати ва иқтисодиёти учун фавқулодда ва жиддий хавф туғдиради, деб ҳисоблайман. Шунинг учун ушбу таҳдидни енгиш мақсадида миллий фавқулодда режимни эълон қиламан», — дейилади Байденнинг баёнотида.

АҚШда бундай фавқулодда режимларни жорий этиш мамлакат президентига маълум бир муаммони ҳал қилиш учун қўшимча чоралар кўришга имкон беради. Лозим топган вақтда Конгресс фавқулодда ҳолатни бекор қилиши мумкин. Айни пайтда АҚШда 30 дан ортиқ бундай фавқулодда режим мавжуд.

Байден Россия президенти Владимир Путин билан яқинда бўлиб ўтган телефон орқали суҳбат чоғида «биргаликда олдинга бориш мумкинлигини очиқ айтганини», аммо «муофиқ» бўлишга қарор қилган ҳолда буни амалга оширмаганини таъкидлади.

У Россия билан зиддият ва кескинлик циклини бошлашни хоҳламаслигини айтди.

Байден Путин билан суҳбатда уни 2021 йил ёзида бир қатор долзарб масалаларни муҳокама қилиш учун Европада учрашишга таклиф қилганини ҳам таъкидлади. Аввалроқ 15 апрель куни санкциялар қўлланилгандан кейин Оқ уй Байден ва Путин ўртасидаги икки томонлама учрашувдан бош тортмаслигини айтган эди.

Эслатиб ўтамиз, АҚШ Россияга қарши янги санкциялар жорий қилди. Янги санкциялар Россиянинг АҚШдаги 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ. Оқ уй февраль ойида Россиянинг ушбу ҳаракатлар учун АҚШ расмийлари унга қарши санкциялар режалаштираётганини айтганди.

Март ойида Қўшма Штатлар Европа Иттифоқи билан биргаликда Россиянинг юқори мартабали амалдорларига мухолифат лидери Алексей Навальнийнинг таъқиб қилиниши сабабли чекловлар киритган эди. Ўшанда Россия Ташқи ишлар вазирлиги Евроиттифоқ ва АҚШнинг санкцияларини «Россияга қарши душманларча ҳамла» деб атаган.