Россиядаги Коррупцияга қарши кураш фонди мамлакат президенти Владимир Путиннинг «энг махфий расмий дала ҳовлиси» бўйича суриштирув эълон қилди. Гап Новгород вилоятининг Валдай кўли ёнидаги «Долгий Борода» турар жойи ҳақида кетмоқда, деб ёзади Meduza.
Хабарга кўра, кадастр ҳужжатлари бўйича турар жой майдони 250 гектарни ташкил этади. Улардан 150 гектари расмий равишда Россия Федерациясига тегишли бўлиб, Федерал хавфсизлик хизмати томонидан доимий фойдаланилади. Унда қўшимча бинолар — омборлар, гаражлар, ангарлар, шунингдек, кичик меҳмонхоналар мавжуд.
Фонд маълумотларига кўра, қолган ерлар «Прайм» МЧЖда рўйхатдан ўтган. Улар Владимир Путиннинг дўсти ва «Россия» банкининг асосий акциядори Юрий Ковальчукга тегишли.
«Прайм» турар жойнинг ушбу қисмини Россия Федерацияси президенти девонига ижарага беради. Фирманинг молиявий ҳисоботларига кўра, сўнгги ўн йил ичида «Прайм» ижара хизматидан 2,7 миллиард рубль (35,3 миллион доллар) даромад олган.
«Прайм»дан ижарага олинадиган ҳудудда 80 га яқин бино мавжуд. Улар орасида майдони 3500 квадрат метр бўлган тўрт қаватли бош сарой, Хитой павильони, рус кулбаси, ҳаммом, сауна, отхона, гольф майдончаси, болалар майдончаси, кинотеатрга эга вип-ресторан, боулинг, бильярд хонаси ва мини-казино, шунингдек, ҳудудга қарашли Владимир черкови бор.
Фонднинг ёзишича, бундан ташқари, асосий қароргоҳдан унчалик узоқ бўлмаган икки баравар катталикдаги уй бор — бу умумий майдони қарийб 7000 квадрат метр бўлган иккита ер ости қаватига эга спа-мажмуаси. Ушбу бино қаватлари режаси соларюм, сузувчи бассейн, криокамералар, массаж ванналари, стоматология, косметология, лой терапияси ва лимфопрессинг хоналари, 25 метрли бассейн ва алоҳида массаж блокидан иборат.
Бошқа қаватда ётоқхона, 200 метрли зал, 500 метрли меҳмонхона, хизмат кўрсатиш хонаси, овқатланиш учун махсус лифт ва аквариум учун 13 квадрат метрли хона мавжуд. Ер ости қаватида ёрдамчи ва тозалик ходимларининг хоналари, шунингдек, тузли ҳаммом, лой терапияси ва махсус алоқа воситалари учун хоналар мавжуд.
Фонд маълумотларига кўра, Валдайдаги қароргоҳ Путиннинг энг севимли уйи. Мазкур турар жой ҳақида жуда кам маълумот мавжуд — расмий фотосуратлар ва давлат харидлари тўғрисидаги маълумотлар бор, холос.
«Қачондир Путин ҳокимиятни тарк этади, қолган уйлар Совет Иттифоқи давридаги каби балансда қолади, аммо бу ерда давлат турар жойсиз ерларнинг ярмигагина эгалик қилади. Қолган ҳаммаси Ковальчукка тегишли. Путин ноль тортишиш кучида ухлайдиган ва рассомларни таклиф қиладиган мана шу жой учун йилига 300 миллион рубль ҳавога совурилади», — дейилади фонд баёнотида.
ОАВ 2018 йилда Юрий Ковальчук ва унинг оиласи тузилмалари Валдай кўлидаги дача атрофидан 460 гектар ўрмон ва далаларни олгани, шунингдек, ерларнинг бир қисмини бошқаришни бошлагани ҳақида ёзган. 2017 йилда «Прайм» компанияси давлат дача ҳудудидан сув қувурини ўтказди ва уни ўз мулки сифатида рўйхатдан ўтказди.
Маълумот учун, Коррупцияга қарши кураш нодавлат ташкилоти, бу Алексей Навальний томонидан 2011 йилда ташкил этилган фонд. Унинг асосий фаолияти — Россия ҳукуматининг юқори органларида суриштирув ўтказиш, коррупция схемаларини ошкор қилиш ва коррупцияни йўқ қилишга қаратилган.
19 январь куни Коррупцияга қарши кураш фонди «Путин учун қурилган қаср» ҳақида катта суриштирув эълон қилган эди.
Алексей Навальний иддао қилишича, Россия президенти Геленжик яқинида, Қора денгиз соҳилида «бутун бошли қироллик»ка эгалик қилади, унинг майдони «Монакодек 39 та князлик ҳудудига тенг».
Кейинроқ Россия президенти Владимир Путин Коррупцияга қарши кураш фонди (ККФ) суриштирувида тилга олинган Гелинжикдаги қасрга на у, на унинг қариндошлари эгалик қилишини билдирди. «У ерда менинг мулким сифатида кўрсатилган нарсаларнинг ҳеч бири на менга, на менинг яқин қариндошларимга тегишли эмас ва ҳеч қачон тегишли бўлмаган. Ҳеч қачон», — деганди Владимир Путин.
Изоҳ (0)