АҚШ Россияга қарши янги санкциялар жорий қилди

АҚШ президенти Жо Байден Россия ҳукуматининг «зарарли ташқи ҳаракатлари» туфайли унга қарши янги санкцияларни қўллаш тўғрисидаги фармонни имзолади. Бу ҳақда Оқ уй веб-сайтига таяниб, Meduza хабар берди.

Янги санкциялар Россиянинг АҚШдаги 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ. Оқ уй февраль ойида Россиянинг ушбу ҳаракатлар учун АҚШ расмийлари унга қарши санкциялар режалаштираётганини айтганди.

Янги чекловларга қуйидагилар киради:

• АҚШ расмийлари наздида Россия разведка агентликларига киберҳужумларда ёрдам бераётган Россиянинг олтита технологик компанияларига қарши санкциялар;
• АҚШдаги 2020 йилги президентлик сайловларига аралашишда ва дезинформация кампанияларини ўтказишда айбланган 16 нафар жисмоний шахс ва 16 та ташкилотга қарши санкциялар;
• Қримнинг Россияга қўшилиши сабабли бешта жисмоний ва учта юридик шахсларга қарши санкциялар;
• Россиянинг Вашингтондаги дипломатик ваколатхонасининг ўн нафар аъзосини чиқариб юбориш (улар орасида разведка ходимлари борлиги тахмин қилинмоқда);
• Россия давлат қарзи билан операциялар ўтказиш бўйича чекловлар: 14 июндан бошлаб америкалик инвесторларга Россия Марказий банки, Молия вазирлиги ёки Миллий бойлик фонди томонидан чиқарилган давлат облигацияларини бирламчи бозорда сотиб олиш тақиқланади.

Ушбу янги чекловлар январь ойида Жо Байден АҚШ президенти бўлганидан бери Оқ уй томонидан Россияга қарши қўлланилган иккинчи санкциялар тўпламидир.

Март ойида Қўшма Штатлар Европа Иттифоқи билан биргаликда Россиянинг юқори мартабали амалдорларига мухолифат лидери Алексей Навальнийнинг таъқиб қилиниши сабабли чекловлар киритган эди. Ўшанда Россия Ташқи ишлар вазирлиги Евроиттифоқ ва АҚШнинг санкцияларини «Россияга қарши душманларча ҳамла» деб атаган.