AQSh prezidenti Jo Bayden Rossiya hukumatining “zararli tashqi harakatlari” tufayli unga qarshi sanksiyalar joriy qilgandan so‘ng, 15-aprel kuni Rossiya haqida bayonot chiqardi. Bu haqda Meduza xabar berdi.
“Agar Rossiya bizning demokratiyamizga aralashishda davom etsa, men bunga javoban keyingi choralarni ko‘rishga tayyorman. Bu mening AQSh prezidenti sifatidagi vazifam”, — dedi Bayden Oq uydagi bayonotida.
Shuningdek, Bayden Rossiya tomonidan kutilayotgan tahdid tufayli favqulodda vaziyat rejimini e’lon qildi.
“Men Rossiya ma’muriyatining olib borayotgan zararli faoliyatini, xususan, AQShda erkin va adolatli saylovlar o‘tkazilishiga putur yetkazuvchi harakatlarini AQSh milliy xavfsizligi, tashqi siyosati va iqtisodiyoti uchun favqulodda va jiddiy xavf tug‘diradi, deb hisoblayman. Shuning uchun ushbu tahdidni yengish maqsadida milliy favqulodda rejimni e’lon qilaman”, — deyiladi Baydenning bayonotida.
AQShda bunday favqulodda rejimlarni joriy etish mamlakat prezidentiga ma’lum bir muammoni hal qilish uchun qo‘shimcha choralar ko‘rishga imkon beradi. Lozim topgan vaqtda Kongress favqulodda holatni bekor qilishi mumkin. Ayni paytda AQShda 30 dan ortiq bunday favqulodda rejim mavjud.
Bayden Rossiya prezidenti Vladimir Putin bilan yaqinda bo‘lib o‘tgan telefon orqali suhbat chog‘ida “birgalikda oldinga borish mumkinligini ochiq aytganini”, ammo “muofiq” bo‘lishga qaror qilgan holda buni amalga oshirmaganini ta’kidladi.
U Rossiya bilan ziddiyat va keskinlik siklini boshlashni xohlamasligini aytdi.
Bayden Putin bilan suhbatda uni 2021-yil yozida bir qator dolzarb masalalarni muhokama qilish uchun Yevropada uchrashishga taklif qilganini ham ta’kidladi. Avvalroq 15-aprel kuni sanksiyalar qo‘llanilgandan keyin Oq uy Bayden va Putin o‘rtasidagi ikki tomonlama uchrashuvdan bosh tortmasligini aytgan edi.
Eslatib o‘tamiz, AQSh Rossiyaga qarshi yangi sanksiyalar joriy qildi. Yangi sanksiyalar Rossiyaning AQShdagi 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq. Oq uy fevral oyida Rossiyaning ushbu harakatlar uchun AQSh rasmiylari unga qarshi sanksiyalar rejalashtirayotganini aytgandi.
Mart oyida Qo‘shma Shtatlar Yevropa Ittifoqi bilan birgalikda Rossiyaning yuqori martabali amaldorlariga muxolifat lideri Aleksey Navalniyning ta’qib qilinishi sababli cheklovlar kiritgan edi. O‘shanda Rossiya Tashqi ishlar vazirligi Yevroittifoq va AQShning sanksiyalarini “Rossiyaga qarshi dushmanlarcha hamla” deb atagan.
Izoh (0)