Байден ва Путиннинг суҳбатидан кейин АҚШ ҳарбий кемаларининг Қора денгизга юборилишини бекор қилди

АҚШ Туркияга АҚШ ҳарбий денгиз кучларининг иккита кемаси Босфор орқали Қора денгизга ўтиш режасини бекор қилганини айтди. Бу ҳақда Туркия ташқи ишлар вазирлигига таяниб, «РИА Новости» хабар берди.

«Мамлакатлар сиёсати» Telegram-каналида ёзилишича, бу Жо Байден ва Владимир Путин ўртасида 13 апрель куни бўлиб ўтган телефон орқали суҳбатидан кейин ўзгаришлар бошлангани ҳамда уруш хавфининг аста-секин узоқлашаётганидан далолат берувчи илк қадам.

Дастлаб, Американинг иккита Роосевелт ва Дональд Cоок эсминецлари 14 ва 15 апрель кунлари навбат билан Қора денгиз ҳудудига кириб, у ерда 4 ва 5 майгача қолиши ҳақида хабар берилган эди. Ушбу манёвр ўз қўшинларини Украина чегарасида тўплаётган Россия учун сигнал бўлиши керак эди.

Пентагон вакили Жон Кирбининг сўзларига кўра, Американинг Қора денгиздаги ҳарбий кемалари операциялари «одатий» бўлиб, АҚШ ушбу ҳаракатларни Монтрё конвенциясига биноан Туркия расмийлари билан мувофиқлаштирмоқда.

Россия ташқи ишлар вазири Сергей Лавровнинг таъкидлашича, АҚШ кемаларининг Қора денгизга ўтишига тажовузкор сафсаталар ҳамроҳлик қилмоқда. Вашингтон аниқ нимани кўзлаётгани Москвага қоронғи бўлиб турибди.

Россия ташқи ишлар вазирининг ўринбосари Сергей Рябков АҚШ кемаларининг Қора денгизга кириб келишини провокация деб атади. «Россия АҚШни Қрим ва Қора денгиз соҳилларидан узоқроқ тургани яхшироқ экани ҳақида огоҳлантиради», — деди у.

АҚШ президенти Жо Байден россиялик ҳамкасби Владимир Путин билан 13 апрель куни бўлиб ўтган телефон орқали суҳбат чоғида уни «яқин ҳафталар»да учрашишга таклиф қилган. Бу ҳақда Брюсселдаги матбуот анжуманида АҚШ давлат котиби Энтони Блинкен маълум қилди.

Блинкеннинг сўзларига кўра, Вашингтон Москва билан барқарор ва олдиндан кўриш мумкин бўлган алоқалар ўрнатишни истайди, бунинг учун алоқа каналларини яратиш керак. Бу АҚШга «қарашларимиз, сиёсатимиз, Россиянинг ҳаракатларига эътирозларимиз тўғрисида очиқ гапиришга имкон беради», деди давлат котиби. «Бу эса вазиятни нотўғри баҳолашдан сақланиш учун муҳимдир. Кеча президент Байден гўшакни олиб, президент Путинга қўнғироқ қилганида ва яқин ҳафталарда учрашишни таклиф қилганида бунинг гувоҳи бўлдингиз», — дея қўшимча қилди у.