Туркманистон президенти Гурбангули Бердимуҳамедов янги икки палатали парламент — Миллий кенгашнинг Халқ маслаҳати палатаси раиси этиб сайланди. Бу ҳақда Туркманистон давлат ахборот агентлиги хабар бермоқда.
Бердимуҳамедов ушбу лавозимга юқори палатанинг 14 апрель куни бўлиб ўтган биринчи мажлиси чоғидаги яширин овоз бериш якунлари бўйича сайланди.
«Мен бу воқеани улкан ҳурмат ва бутун халқ олдидаги катта масъулият деб қабул қиламан», — деди президент унга билдирилган ишончни оқлаш учун бор кучини ишга солишга ҳамда палаталар ва бутун Миллий кенгашнинг тўлақонли фаолияти учун ҳар томонлама кўмак кўрсатишга ваъда бериб.
Мажлисни очиш чоғида Бердимуҳамедов 2020 йил сентябрда бўлиб ўтиб, конституциявий комиссия томонидан тайёрланган Туркманистоннинг Бош қонунига ўзгартиришлар ва қўшимчалар тасдиқланган Халқ маслаҳати мажлисининг тарихий аҳамиятини қайд этди. Уларга мувофиқ, «Туркманистон Миллий кенгаши тўғрисида»ги қонун қабул қилинган, унинг асосида эса мамлакатда икки палатали парламент тузилган эди.
Юқори палата мажлиси чоғида, шунингдек, Халқ маслаҳати раиси ўринбосари ҳам сайланди ва бешта қўмита ташкил этилди, булар — Инсон ҳуқуқлари ва эркинликлари қўмитаси, Иқтисодиёт, молия ва ижтимоий сиёсат қўмитаси, Илм-фан, таълим, рақамли тизим, спорт ва маданият қўмитаси, Минтақавий ривожланиш, атроф-муҳитни асраш ва агросаноат сиёсати қўмитаси ҳамда Халқаро масалалар қўмитаси.
Янги парламентнинг фаолияти бошланишига атаб Халқ маслаҳати аппарати биноси очилди. Баландлиги 31,36 метр ва узунлиги 112 метр бўлган мажмуа майдони 6,39 гектар бўлган ҳудудда жойлашган.
Аввалроқ Туркманистон президенти Бердимуҳамедов конституцияга зид равишда парламент аъзоси этиб сайлангани хабар берилган эди.
2020 йил сентябрь ойида қабул қилинган янги таҳрирдаги Туркманистон конституциясининг 73-моддасига мувофиқ, президент Туркманистон Миллий Кенгашининг аъзоси ёки депутати бўлиши мумкин эмас.
Конституциянинг янги таҳрири Адлия вазирлигининг веб-сайтида ҳали чоп этилмаган, аммо 2020 йил 26 сентябрда ўзгартиришлар «Нейтрал Туркманистон» газетасида эълон қилинган.
Миллий кенгаш — парламентнинг умумий номи, у икки палатадан - Халқ маслаҳати ва Халқ мажлисидан иборат.
Бундан кўриниб турибдики, ҳозирги давлат раҳбари на Мажлис депутати ва на Халқ маслаҳати аъзоси бўлиши мумкин. Конституциянинг 78-моддаси барча собиқ президентларга янги палатада ўринга эга бўлишни кафолатлайди, аммо Бердимуҳамедов ҳали ўз лавозимини тарк этмаган.
Шунингдек, 87-модда Халқ маслаҳати аъзолари ва Халқ мажлиси депутатларига бир вақтнинг ўзида Вазирлар Маҳкамаси аъзоси лавозимини эгаллашни тақиқлайди, Бердимуҳамедов эса бунга зид равишда Вазирлар Маҳкамасининг раисидир.
Маълумот учун, Халқ маслаҳати 56 аъзодан иборат. Улардан 48 нафари бешта вилоят ва Ашхобод шаҳри томонидан, яна 8 нафари президент томонидан тайинланади. 8 мартгача давом этган рўйхатга олишдаги 111 номзод орасида амалдаги президент бўлмаган. Бироқ давлат ахборот агентлиги ҳисоботида 112 номзод тилга олинган, яъни Бердимуҳамедов бошқа номзодлар рўйхати эълон қилинганидан кейин рўйхатдан ўтган ёки у ўз номзодини ўзи кўрсатган.
Эслатиб ўтамиз, Туркманистонда 28 март куни биринчи марта парламентнинг юқори палатаси — Халқ маслаҳати учун сайловлар бўлиб ўтди.
Маълумот учун, мамлакат ҳаётига бағишланган «Буюк ютуқлар хроникаси»нинг 2019 йилда чоп этилган 13-томида Халқ маслаҳати йиғилиши (ўша пайтда у маслаҳатчи орган эди)да икки палатали парламент яратишнинг таклиф қилиниши йилнинг асосий ҳодисаси дея қайд этилган. 2021 йилда Туркманистонда икки палатали тизим жорий қилинди.
Изоҳ (0)