Литванинг Клайпеда шаҳрида яшовчи 78 ёшли эркак коронавирусга қарши Moderna вакцинасининг иккинчи дозасини олганидан сўнг вафот этди. Бу ҳақда воқеа содир бўлган касалхонанинг бош шифокори Лорета Венцкенга таяниб «РБК» хабар берди.
Бош шифокорнинг сўзларига кўра, дастлабки маълумотлар пенсионернинг ўлими вакцина билан боғлиқ эмаслигини кўрсатмоқда.
«Фикримча, қариянинг ўлимига эмлашнинг ҳеч қандай алоқаси йўқ. Чунки буни кўрсатувчи аломатлар, хусусан, тромболизм ёки анафилактик реакция йўқ», — деди Венцкен. Шунингдек, у эркакнинг касалхонада узоқ вақт кузатув остида бўлгани, унда жиддий касалликлар бўлмаганини таъкидлади.
Moderna биотехника компанияси ўзи ишлаб чиқарган вакцина устида олиб борилган тадқиқотлардан сўнг препаратнинг самарадорлик даражасини пасайтирди.
2020 йил декабрь ойида Moderna вакцинасининг самарадорлиги 94,1 фоизга баҳоланган эди. Ҳозир маълум бўлишича, препарат 90 фоиз ҳолатда инфекцияни юқтришнинг олдини олади, касалликнинг оғир шаклидан эса 95 фоиз ҳимоя қилади. 30 мингдан ортиқ одамни қамраб олган клиник синовларнинг учинчи босқичи натижалари бўйича ушбу хулосага келинган.
Тадқиқот натижалари Америка акушерлик ва гинекология журналида чоп этилган. Унда таъкидланишича, коронавирусга қарши Pfizer ва Moderna вакциналари ҳомиладор аёллар учун хавфсиз ва самарали ҳисобланади.
Эслатиб ўтамиз, Moderna компанияси февраль ойида ўз вакцинасини коронавируснинг Жанубий Африка Республикасида пайдо бўлган янги штаммига қарши самарали бўлган янгиланган версиясини ишлаб чиққанини маълум қилди.
Аввалроқ Moderna коронавирус вакцинасини олти ойликдан 12 ёшгача бўлган болаларда синашни бошлаган эди. Синов жараёнида, тахминан, АҚШ ва Канададан 6750 нафар бола қатнашиши режалаштирилган.
Маълумот учун, АҚШ Озиқ-овқатлар ва дорилар сифати бўйича бошқармаси (FDA) 18 декабрь куни Американинг Moderna фармацевтика компанияси томонидан ишлаб чиқарилган коронавирусга қарши вакцинани мамлакатда қўллаш учун рухсат берган.
Изоҳ (0)