Россиянинг «Спутник V» вакцинаси Сербияда чиқарила бошлади. Уни яна қайси мамлакатлар ишлаб чиқаради?

Сербия Россиянинг коронавирусга қарши «Спутник V» вакцинасини ишлаб чиқаришни бошлади. Бу ҳақда препарат ишлаб чиқарувчиси Twitter’да маълум қилди, деб ёзади «Интерфакс».

BREAKING: #Serbia starts #SputnikV production!

RDIF & Institute of Virology, Vaccines and Sera “Torlak” join forces to bring more Sputnik V vaccines to the world!

✌️ pic.twitter.com/mi1iImbbD0

— Sputnik V (@sputnikvaccine) April 14, 2021

Хабарга кўра, вакцинани ишлаб чиқариш «Торлак» вакцина ва зардоблар вирусология институти негизида йўлга қўйилган. Заводнинг қуввати йилига 20 миллион дозагача вакцина ишлаб чиқаришга имкон беради.

Бир кун олдин Россия тўғридан-тўғри инвестиция фонди (RDIF) раҳбари Кирилл Дмитриев Ҳиндистонда ҳам ушбу вакцинани ишлаб чиқариш бошланганини эълон қилди. Ҳиндистон 13 апрель куни Россия дори воситасидан фойдаланишни маъқуллаган эди. У ерда RDIF бешдан ортиқ йирик ишлаб чиқарувчилар билан келишувга эга. Унга кўра, RDIF барча ишлаб чиқариш майдонларида вакцинанинг сифатини назорат қилишни таъминлайди ва кафолатлайди. Дмитриев вакцинани ишлаб чиқариш бўйича дунёнинг 10 мамлакатидаги 20 та ишлаб чиқарувчи билан шартнома тузилганини қайд этиб ўтди.

Хусусан, «Спутник V» яқин келажакда Эронда, яқин ойларда эса Италияда ишлаб чиқарилиши маълум қилинди.

«Россия вакцинаси аллақачон Беларусь, Қозоғистон ва Сербияда ишлаб чиқарилмоқда. Яқинда Эронда препаратни ишлаб чиқариш бошланади», — деди Дмитриев.

Унинг сўзларига кўра, Италиядаги Adienne Pharma & Biotech компаниясининг заводида ҳам препаратни ишлаб чиқариш режалаштирилган.

Март ойида Италия—Россия савдо палатаси «Спутник V» ни ишлаб чиқариш Миланда режалаштирилганини эълон қилди. Препаратни RDIF билан шартнома имзолаган Adienne Pharma & Biotech швед компанияси ишлаб чиқаради. Италияда вакцинани 2021 йилнинг учинчи чорагида чиқариш режалаштирилган.

Эронда «Спутник V» январь ойининг охирида рўйхатдан ўтказилган эди. Шу билан бирга, мамлакат ташқи ишлар вазири вакцинани мамлакат ҳудудида ишлаб чиқарилишига умид билдирган.

7 февраль куни Эрон соғлиқни сақлаш вазирининг ўринбосари Муҳаммад Ризо Шанеҳсоз мамлакат ушбу масала бўйича Гамалея маркази билан музокаралар олиб бораётганини айтди. Март ойининг охирида Эроннинг Россиядаги элчиси Козеи Жалали Эронда «Спутник V» ни ишлаб чиқариш апрель ойида бошланиши кераклигини маълум қилди.

Россиянинг Гамалея марказида ишлаб чиқариладиган «Спутник V» вакцинаси айни пайтда 60 та мамлакатда рўйхатдан ўтказилган. Хусусан, «Спутник V» вакцинаси Венгрия, Ливан, Серб Республикаси, Жазоир, Аргентина, Беларусь, Боливия, БАА, Сербия, Фаластин, Парагвай, Покистон, Туркманистон ва Венесуэлада фойдаланиш учун тасдиқланган.