Россиянинг Биологик хавфсизлик ва технологик мустақиллик маркази ўлатга қарши дунёдаги бринчи вакцинани яратди. Бу ҳақда мамлакат бош вазирининг ўринбосари Татьяна Голикова маълум қилди, деб ёзади «РБК».
«Суббирлик вакциналарни оммавий ишлаб чиқариш учун генетик технологиядан фойдаланган ҳолда мослаштирилган вакцина штаммлари яратилди», — деди Голикова.
Унинг сўзларига кўра, мазкур штаммлар ўлатга қарши дунёдаги биринчи вакцинани яратиш жараёнида синовдан ўтказилган.
Таъкидланишича, суббирлик вакциналарида иммунитет тизимига таниш бўлган вирус ёки бактериянинг бўлакларидангина фойдаланилади. Вакциналарда бутун микроорганизмлар ёки зарарсиз вируслар мавжуд эмас.
Россия Истеъмолчилар ҳуқуқларини ҳимоя қилиш ва инсон фаровонлигини назорат қилиш федерал хизмати («Роспотребнадзор») Россиянинг Мўғулистон ва Хитой билан чегарадош ҳудудларида ўлатнинг табиий ўчоқлари мавжудлигини хабар қилган.
Аввалроқ Қозоғистон олимлари радиацияга қарши дунёдаги биринчи дорини яратгани ҳақида хабар берилганди. Қозоғистон тиббиёт олимлари одатда қон кетишни тўхтатишда фойдаланиладиган «аминокапроик кислота» препарати инсон танасини нурланишдан самарали ҳимоя қилишга қодир эканини аниқлаган.
Изоҳ (0)