Арманистон бош вазири Никол Пашинян апрелнинг охирги ўн кунлигида истеъфо беради

Арманистон бош вазири Никол Пашинян мамлакатда муддатидан илгари парламент сайловлари ўтлазилиши туфайли апрелнинг охирги ўн кунлигида ҳукумат раҳбарлигидан истеъфо беришини маълум қилди, деб ёзмоқда «Интерфакс».

«Апрелнинг охирги ўн кунлигида истеъфога чиқаман. Истеъфо берганимдан кейин етти кун ўтгач, парламентда янги бош вазир ўрни учун сайловлар ўтказилади. Бош вазирлик учун номзодимни ‘Менинг қадамим’ фракциясидан қўяман», — деган Пашинян парламентда ўтказилган «ҳукумат соати»да.

Унинг сўзларига кўра, «Менинг қадамим» фракцияси Пашинян номзодини иккинчи марта бош вазирлик лавозими учун илгари суради.

«Қолган фракциялар бош вазир ўрнини эгаллаш учун ўз номзодларини яна тақдим қилмайди. Мен яна сайланмайман, шу тариқа Арманистон парламенти қонун кучи билан тарқатиб юборилади ва 20 июнда янги парламент учун муддатидан илгари сайловлар ўтказилади», — дея қайд этган Пашинян.

Арманистон конституциясига кўра, парламент тарқатиб юборилиши учун мамлакат бош вазири истеъфога чиқиши зарур. Агар парламент икки марта янги бош вазирни танлай олмаса, автоматик равишда тарқатиб юборилади ва қайтадан сайловлар ўтказилади. Янги бош вазир парламентдаги кўпчиликнинг овозига эга бўлиши лозим.

Сайловлар парламент томонидан қабул қилинган Сайлов кодексига киритилган ўзгартиришлар доирасида ўтади ва унда сайловларнинг рейтингли тизимидан воз кечилган ва овоз бериш жараёни пропорсионал тизимда ўтказилади.

Парламентдаги мухолиф фракциялар «Нурли Арманистон» ҳамда «Ривожланаётган Арманистон» сайловларнинг янгиланган овоз бериш тизими асосида ўтишига розилик берган.

Парламентга кирмаган мухолифат эса Арманистондаги сайловларнинг муваққат ҳукумат тузилганидан кейин ўтказиш мақсадга мувофиқлигини билдирган.

Пашинян март охирида муддатидан аввалги сайловлар ўтказилишини таъминлаш учун апрелда истеъфога чиқишни ваъда қилганди.

Арманистондаги сиёсий инқироз ҳамда Пашиняннинг истеъфосини талаб қилувчи норозилик намойишлари 2020 йил 10 ноябрда ҳукуматнинг Россия ва Озарбайжон раҳбарлари билан Тоғли Қорабоғдаги ҳарбий ҳаракатларни тўхтатиш тўғрисида қўшма баёнот имзоланганидан сўнг бошланганди. Ушбу шартномага биноан Боку Қорабоғ ҳудудининг бир қисми устидан назоратни қўлга киритганди. Пашиняннинг сиёсий мухолифлари ва оппозиция тарафдорлари сулҳ шартларидан норози бўлиб, бош вазирни Озарбайжонга таслим бўлганлик ва ўз халқига хиёнат қилганликда айблаган. Олимлар, маданият арбоблари, барча католик арманлар роҳиби Гарегин II, Арманистоннинг уч нафар собиқ президенти, шунингдек, Бош штаб қўмондонлиги Пашинянни истеъфога чиқишга чақирган.