Чехия президенти Милош Земан оёғидаги касаллик сабабли ногиронлар аравачасида ҳаракатланади. Бу ҳақда Праганинг Blesk нашрига таяниб «РБК» хабар берди.
Фото: Global Look Press
«Ногиронлар аравачасидан фойдаланишга қарор қилдим. Ҳозир Lany (шаҳар ташқарисидаги қароргоҳ) ва баъзида Прага қалъасида ҳам аравача ёрдамида ҳаракатланяпман. Бу жуда қулай», — деди Земан.
Земаннинг сўзларига кўра, агар 28 октябрь куни Прага қалъасида Чехославакия ташкил топганининг 103 йиллиги нишонланса, у ташриф буюрувчиларни аравачада ўтириб қарши олади.
Президент ҳали ҳам мўъжизага ишонаётгани ва кўчада ҳаво исиб кетиши билан юришни машқ қилишини таъкидлади. «Одатда невропатиянинг давоси бўлмайди ва у маълум даражада ривожланиб боради, оёқларимнинг аҳволи ёмонлашмоқда», — деб хулоса қилди у.
76 ёшли Земан анча вақтдан буён Прагадаги Марказий ҳарбий шифохонада оёқ невропатияси ва диабетдан даволаниб келади.
2020 йилда Чехия президенти қўлидан олган жароҳати сабабли шифохонага ётқизилган эди. Президент матбуот котибининг сўзларига кўра, Земан кечқурун телевизордаги янгиликларни кўриб бўлгач, темир ҳассасидан ёки хавфсизлик хизмати ходимларининг ёрдамидан фойдаланмаган, натижада қоқилиб йиқилган ва қўлини синдириб олган.
Земан 2013 йил президент этиб сайланган эди, 2018 йилда у иккинчи беш йиллик муддатга яна қайта сайланди.
Аввалроқ Италия собиқ бош вазири, «Олға, Италия» партиясининг етакчиси Сильвио Берлускони яна «Сан-Рафаэл» шифохонасига ётқизилгани маълум бўлди.
Шунингдек, Францияда 3 апрель кунидан 4 апрель кунига ўтар кечаси номаълум шахслар тадбиркор ва сиёсатчи Бернар Тапининг уйига бостириб кирди ва уни тўнаб кетди. Натижада Тапининг турмуш ўртоғи олинган жароҳатлар сабабли шифохонага ётқизилди.
Британиялик миллионер, 83 ёшли Ричард Лексингтон Саттонга эса Дорсет графлигидаги Гиллингем шаҳри яқинида жойлашган шаҳар ташқарисидаги қасрида ҳужум уйиштирилди. Миллионер олинган жароҳатлар натижасида воқеа жойида вафот этди.
