Fransiyada Adidas’ning sobiq egasi millioner Bernar Tapini do‘pposlab, talab ketishdi

Fransiyada 3-aprel kunidan 4-aprel kuniga o‘tar kechasi noma’lum shaxslar tadbirkor va siyosatchi Bernar Tapining uyiga bostirib kirdi va uni to‘nab ketdi. Bu haqda BFM telekanaliga tayanib “RBK” xabar berdi.

Voqea Parijning janubi-sharqidagi Sena va Marna departamentida, Tapining shahar tashqarisidagi uyida sodir bo‘ldi. To‘rt nafar erkak milliarderning uyiga bostirib kirib, Bernar va uning xotini Dominik Tapiga hujum qildi hamda qimmatbaho buyumlarni o‘g‘irlab ketdi.

Tapining uyi joylashgan Komb-la-Vil shaharchasi meri Gi Joffruaning xabar berishicha, jinoyatchilar uy egalarini bog‘lab qo‘ygan va kaltaklagan. Dominik shifoxonaga yotqizildi, o‘g‘rilar uni bir necha marta zarb bilan urgan. Endilikda u uyiga qaytdi.

Joffruaning so‘zlariga ko‘ra, o‘g‘rilarning shafqatsizligi, ehtimol, ularning puchga chiqqan umidi bilan izohlanadi. “Ular xazina topdik deb o‘ylagan, lekin olishga arzigulik hech narsa bo‘lmagan”, — dedi u.

Prokuratura zo‘ravonlik qo‘llagan holda o‘g‘rilik qilish bo‘yicha jinoyat ishi ochdi. Jinoyatchilar hali qo‘lga olinmadi, ular qidirilmoqda.

78 yoshli Bernar Tapi yoshligida poygalar va estradada karyera qilishga harakat qilgan, lekin muvaffaqiyatga erisha olmagan. 1967-yilda tadbirorlik bilan shug‘ullana boshlagan, keyin bankrotga uchragan korxonalarni qayta tiklash bilan shug‘ullanuvchi Bernard Tapie Finances firmasiga asos solgan.

1986-yilda 35 million dollarga “Marsel” futbol klubini sotib olgan va sakkiz yil mobaynida klub prezidenti vazifasini bajargan. 1990-yildan 1993-yilgacha Adidas kompaniyasiga egalik qilgan. Hozir u Bernard Tapie Group holdingi boshqaruvchisi, shuningdek, La Provence va Corse-Matin gazetalarini nashr etuvchi La Provence Groupe’ning 89 foiz ulushiga egalik qiladi. 2019-yilda Tapining boyligi 200—250 million yevroga baholangan.

2000-yilgacha Tapi siyosat bilan shug‘ullangan va Fransiyaning radikal so‘l partiyasi a’zosi bo‘lgan. 1989-yildan 1995-yilgacha Milliy majlis deputati, 1992—1993-yillarda shaharlar masalasi bo‘yicha vazir, 1994-yildan 1997-yilgacha Yevroparlament deputati lavozimlarida ishlagan.

Avvalroq Chexiyaning eng boy odami, PPF Group asoschisi Petr Kellner 27-mart kuni 56 yoshida Alyaskaning Ankorij shahri sharqidagi muzlikda sodir bo‘lgan Eurocopter AS50 vertolyoti ishtirokidagi aviahalokat oqibatida vafot etgani haqida xabar berildi.

Aviahalokat natijasida jami besh kishi halok bo‘ldi, oltinchi yo‘lovchi omon qoldi va og‘ir ahvolda shifoxonaga yotqizildi. Halokat sabablari aniqlanmoqda. Petr Kellnerdan tashqari, Chexiyaning yana bir fuqarosi Benjamen Laroshe, ikki nafar gid va uchuvchi halok bo‘ldi.

Shuningdek, Fransiyaning shimoli-g‘arbida ichida fransiyalik milliarder va siyosatchi Olivye Dasso bo‘lgan vertolyot qulab tushdi. Oqibatda Dasso va uchuvchi halok bo‘ldi. 2020-yil Dasso Forbes jurnalining milliarderlar reytingida 4,7 milliard dollar bilan 361-o‘rinni egallagan.