Хитой ўзининг коронавирусга қарши вакциналари самарадорлиги паст эканини тан олди

Хитойнинг коронавирусига қарши вакциналари инфекциядан «жуда юқори даражада ҳимоя» қила олмайди. Бу ҳақда Хитой касалликларни назорат қилиш ва олдини олиш маркази директори Гао Фунинг баёнотига таяниб, Meduza хабар берди.

«Биз мавжуд вакциналарнинг юқори даражадаги ҳимояга эга эмаслиги тўғрисидаги муаммони ҳал қиламиз. Ҳозир эса иммунизация жараёни доирасида турли хил вакциналардан фойдаланишимиз керакми, деган савол устида бош қотирмоқдамиз», — деди Гао Фу Ченду шаҳрида бўлиб ўтган конференцияда Хитой вакциналари тақдимоти чоғида.

Шунингдек, у хусусан, Американинг Pfizer ва Moderna компаниялари препаратларини ўз ичига олган мРНК туридаги (оқсил тартиби шифрланган РНК) вакциналарининг афзалликлари ҳақида гапирди. Кейинроқ Associated Press’га берган интервьюсида Гао Фу вакциналар самарадорлиги ҳақида гапирганда айнан Хитой эмас, бутун дунё вакциналарини назарда тутганини айтди.

Айни пайтда Хитойда Sinovac, Sinopharm, CanSino вa Anhui Zhifei Longcom компанияларида ишлаб чиқарилувчи бешта вакцина тасдиқланган. Уларнинг ҳеч бири мРНК вакцинаси турига кирмайди.

Ишлаб чиқувчиларнинг фикрига кўра, Хитой вакциналарининг самарадорлиги 49 дан 79 фоизгача. Pfizer ва Moderna препаратларининг самарадорлиги эса 90 фоиздан ошади. Агар вакцинанинг самарадорлиги 50 фоиздан юқори бўлса, ундан фойдаланиш мақсадга мувофиқ деб ҳисобланади.

Хитойнинг Касалликларни назорат қилиш ва олдини олиш маркази маълумотларига кўра, апрель ойи бошига келиб мамлакатда қарийб 100 миллион одам коронавирусга қарши вакцинанинг ҳеч бўлмаганда битта дозасини олган.