Европа аёллари ассоциацияси Анқарадаги курси можароси муносабати билан Европа Кенгаши раиси Шарль Мишелнинг истеъфосини талаб қилди. Можаро Еврокомиссия раҳбари Урсула фон дер Ляйен учун ўриндиқ етмай қолгани сабабли келиб чиққан эди, деб ёзади «Korrespondent.net».
Таъкидланишича, ассоциацияси томонидан Мишелнинг шахсан ўзига худди шу талаб билан хат юборилган. Шу тарзда Хотин-қизларнинг имкониятларини кенгайтириш халқаро хайрия фонди Европа Кенгаши раҳбарини Туркиядаги хатти-ҳаракатлари орқали «дипломатия, Европа Иттифоқи ва инсон ҳуқуқлари, айниқса, аёллар ҳуқуқлари»га зарар етказишда айбламоқда.
«Арзимаган узрларингиз сиз туфайли Европада минтақа фуқароларига нисбатан, шунингдек, аксарият ОАВ ушбу воқеани мазах билан таърифлаётган дунёга нисбатан ҳосил бўлган сиёсий бўшлиқни тўлдира олмайди. Шунинг учун биз сиздан Европа Кенгаши раиси лавозимидан кетишингизни сўраймиз», — дейилади хатда.
Нашрнинг ёзишича, 11 апрель оқшомигача Бельгия, Франция, Италия ва Европа Иттифоқига аъзо бўлмаган мамлакатлардан 4 мингга яқин аҳоли истеъфо тўғрисидаги петицияни имзолаган.
Ҳужжатда таъкидланишича, Шарль Мишель ушбу воқеа орқали Урсула фон дер Ляйен билан бир қаторда «барча аёлларни ҳақорат қилган».
Эслатиб ўтамиз, Туркиянинг Анқара шаҳрида мамлакат президенти Ражаб Тоййиб Эрдўғон ва Европа Кенгаши раҳбари Шарль Мишель билан бўлган учрашувда Европа комиссияси раҳбари Урсула фон дер Ляйенга курси етмай қолди. Тасвирда сиёсатчиларнинг ўз ўринларини эгаллагани, фон дер Ляйен эса уларнинг ортидан кириб бўш ўриндиқ топа олмаганини кўриш мумкин. Лекин вазият дарҳол бартараф этилди, Еврокомиссия раиси хонада турган дивандан жой эгаллади.
Кейинроқ Евроиттифоқ Туркияда Еврокомиссия раҳбарига курси етишмай қолиши билан боғлиқ воқеага муносабат билдирди.
Изоҳ (0)