Россия ветеринария ва фитосанитария назорати бўйича федерал хизмати («Россельхознадзор») 7 апрелдан Фарғона вилоятидан Россия ҳудудига помидор ва қалампирдан ташқари барча ўсимлик маҳсулотларини олиб киришга рухсат берди. Бу ҳақда идора сайтида маълум қилинди.
Унда айтилишича, «Россельхознадзор» Ўзбекистон Вазирлар Маҳкамаси ҳузуридаги ўсимликлар карантини бўйича давлат инспекциясидан карантин аҳамиятига эга бўлган маҳсулотларни экспорт қилишда фитосанитария сертификати устидан назорат кучайтирилиши ҳақида маълумот олган.
Шу сабабли «Россельхознадзор» Ўзбекистон томоннинг кафиллиги билан 2021 йил 7 апрелдан бошлаб помидор ва қалампирдан ташқари барча ўсимлик маҳсулотларини Фарғона вилоятидан Россияга олиб киришга рухсат бериш мумкин деб топган.
Эслатиб ўтамиз, Фарғона вилоятида етиштириладиган помидор ва қалампир маҳсулотларининг Россия ҳудудига олиб кирилишига тақиқ 2020 йилнинг 26 ноябрида қўйилган эди. Бунга ушбу маҳсулотларда карантин касаллиги тобамовирус аниқланганлиги сабаб қилиб кўрсатилган.
Кейинроқ қуритилган ўрик партиясида ҳам хавфли зараркунанда (капр қўнғизи) аниқлангач, «Россельхознадзор» Фарғонадан барча турдаги ўсимлик маҳсулотлари импортини тақиқлади. Россия томони шу каби тақиқларни Навоий ва Қашқадарё вилоятида етиштирилган маҳсулотларга ҳам жорий этган.
Фарғона вилояти ҳокими Хайрулло Бозоров Россияга юборилган помидордан чиққан касаллик Фарғонадаги бирорта иссиқхонада аниқланмаганини айтганди. 2020 йилнинг январида Ўсимликлар карантини давлат инспекцияси Россиянинг Ўзбекистоннинг айрим қишлоқ хўжалиги маҳсулотларига тақиқ қўйишига сабаб бўлган ташхис нотўғри бўлиб чиққанини маълум қилди. 2021 йилнинг март ойида «Россельхознадзор» Россияга Навоий ва Қашқадарёдаги олтита корхонадан помидор олиб киришга рухсат берди.
Изоҳ (0)