AstraZeneca вакцинаси билан эмлаш тромблар келтириб чиқариш тўғрисидаги хабарлар фонида Жанубий Корея 60 ёшгача бўлганларни ушбу препарат билан эмлашни тўхтатади. Шунингдек, таълим ҳамда ногиронларни парваришлаш муассасаларидаги ходимлар ва тиббиёт ходимларини эмлаш кейинга қолдирилади. Бу ҳақда Корея касалликларни назорат қилиш ва олдини олиш агентлиги (KDCA)га таяниб «РИА-Новости» хабар берди.
«Махсус ва болалар таълими муассасалари ишчилари, мактаблардаги соғлиқни сақлаш ходимлари, ногиронларни парваришлаш муассасалари ва болалар боғчалари ходимларини эмлаш кейинга қолдирилади. AstraZeneca вакцинаси билан 60 ёшгача бўлган одамларда олиб борилаётган эмлаш ишлари вақтинча тўхтатилади», — дейилади KDCA баёнотида.
Баёнотда кўрсатилган фуқаролар гуруҳларини эмлаш ишлари шу ҳафта бошланиши керак эди. Аввалроқ, апрель ойида баъзи таълим муассасалари ходимлари, хусусан, ногирон болаларга ғамхўрлик қилиш учун масъул бўлган 51 мингга яқин ўқитувчилар ва болалар боғчаларида яна 13 минг соғлиқни сақлаш ходими AstraZeneca вакцинаси билан эмланиши ҳақида хабар берилган эди.
6 апрель куни Европа дори-дармон агентлиги (EMA) вакили коронавирусга қарши AstraZeneca вакцинаси билан эмлаш ва қонда тромб келиб чиқиши ўртасидаги боғлиқликни тасдиқлади. «Эндиликда AstraZeneca билан эмлашнинг тромбоз келтириб чиқаришини аниқ айта оламиз. Аммо ушбу реакцияга нима туртки бўлаётганини ҳали билмаймиз», — деди EMA вакили Марко Кавалери.
Эслатиб ўтамиз, препарат билан эмланганлар орасида тромбоз ва кетма-кет содир бўлган ўлим ҳолатлари сабабли AstraZeneca вакцинасининг обрўси тушиб кетди. Биринчи бўлиб Австрия давлати вакцинадан фойдаланишни тўхтатди. Кейинчалик Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго ва Жанубий Африка мамлакатларида мазкур вакцинадан фойдаланиш тўхтатилган.
Европа Дори-дармон агентлиги (EMA) коронавирусга қарши AstraZeneca вакцинаси хавфсиз ва самарали деб эълон қилгач, Европа давлатлари ушбу препарат билан эмлашни қайта бошлади. Шунингдек, ЖССТ ҳам AstraZeneca билан эмлашда давом этишни тавсия қилди. Хусусан, Германия, Франция, Италия, Испания, Болгария, Португалия ва Словения, шунингдек, Канада ва Латвияда ҳам AstraZeneca билан эмлашни қайта бошлашга рухсат берилди.
Бироқ Норвегия, Швеция, Финляндия, Исландия ва Ирландия ҳали ҳам AstraZeneca’ни қўллашдан бош тортмоқда.
Изоҳ (0)