АҚШ ҳарбий ҳаво кучларининг AGM-183A ARRW гипертовушли ракетаси синовлари муваффақиятсиз тугади. Бу ҳақда CNN агентлигига таяниб, «РБК» хабар берди.
Хабарга кўра, ракета Boeing B-52 Stratofortress бомбардимончи самолётидан учирилиши керак эди. «Бироқ ракета учиш тартибини якунлай олмади ва самолётда қолиб кетди. Самолёт ракета билан Калифорниядаги Эдвардс авиабазасига қайтиб келди», — дейилади АҚШ ҳарбий ҳаво кучлари баёнотида.
Ҳарбийлар муваффақиятсизлик сабабларини ўрганиш, «ундан сабоқ олиш» ва ракетани яна учиришга ҳаракат қилишни режалаштирмоқда. Улар ракетанинг товуш тезлигидан 20 баравар тезроқ уча олишига умид қилмоқда, деб ёзади CNN.
2020 йил сентябрь ойида АҚШ ҳарбий кучлари иккита гипертовушли ракета прототипларини муваффақиятли синовдан ўтказган эди. Гап Lockheed Martin ва Raytheon томонидан ишлаб чиқилган ҳаво-реактив двигателлари ҳақида бормоқда. Ушбу ракеталар ўз-ўзидан учиб кетмаган. Ташувчи самолётнинг қуйи қисмидан учирилган мазкур ракеталарнинг товуш тезлигидан беш баравар юқори тезлик ва босимга бардош бериш қобилияти синовдан ўтказилган.
Кейинчалик Пентагон гипертовушли қуроллар 2023 йилдан АҚШнинг қуруқликдаги кучлари билан хизматга киришишини маълум қилди. АҚШ собиқ мудофаа вазири Марк Эспернинг сўзларига кўра, гипертовушли қуроллар АҚШ армиясининг «вазифалар рўйхатининг юқорисида» туради. «Унинг ривожланишига мисли кўрилмаган инсон ва молиявий ресурслар йўналтирилган», — деди Эспер.
2019 йилда АҚШ генерали гипертовушли қуролларнинг 2022 йилда жанговар ҳолатга келтирилишини айтган эди. Аввалроқ Марк Эспер АҚШ гипертовушли қурол ишлаб чиқишда Россиядан ортда қолаётганини тан олган ва Вашингтон ушбу йўналишдаги ишларни кучайтириши лозимлигини таъкидлаган эди.
Изоҳ (0)