Жанубий Корея ҳукумати Халқаро олимпия қўмитаси (ХОҚ)га 2032 йилги ёзги Олимпия ўйинларини Шимолий Корея билан ҳамкорликда ўтказиш бўйича таклиф юборди. Бу ҳақда ҳукумат баёнотига таяниб Yonhap агентлиги хабар берди, деб ёзмоқда «РБК».
«23 февраль куни ХОҚ 2032 йилги ёзги Олимпия ўйинларини ўтказиш учун Австралиянинг Брисбен шаҳрини танлади. Жанубий Корея ва Сеул шаҳри дарҳол бу қарордан норози эканини билдирди ва ХОҚ билан маслаҳатлашди ҳамда ўйинларнинг ҳамкорликда ўтказилиши таклифини берди», — дейилади ҳукумат баённомасида.
Таъкидланишича, Жанубий Корея президенти Мун Чжэ Ин ва Шимолий Корея президенти Ким Чен Ин 2032 йилда ўтказиладиган ёзги Олимпия ўйинларида ҳамкорлик қилишга келишиб олди. 2018 йилда улар ҳамкорлик декларациясини қабул қилган эди. Шунингдек, ҳукумат ХОҚдан бошқа талабгорлар билан ҳам музокараларни давом эттиришни сўради, чунки Брисбен ҳали 2032 йилги Олимпиаданинг расмий мезбони сифатида тасдиқланмади.
Аввалроқ 2032 йилги олимпиада ўйинлари Хитойнинг Чэнду ва Чунцзин шаҳарларида, Қатар пойтахти Доҳада, Венгрия пойтахти Будапештда ва Германиянинг Рейн-Рур ҳудудида ўтказиш режалаштирилган эди.
2019 йил июнь ойида ХОҚ Олимпиада пойтахтини танлаш бўйича одатий тартибини бекор қилди — энди халқаро мусобақа бошланишидан етти йил олдин ўйинлар учун расмий жой танланиш бўйича талаблар мавжуд эмас. Бундай вазиятда ХОҚ мусобақа мезбонини танлашда мамлакатдаги доимий ёки вақтинча спорт ва инфратузилма иншоотлари мавжудлигидан келиб чиқиб қарор қабул қилади. Энг мақбул вариантни танлаш ёзги ва қишки ўйинлар бўйича махсус комиссияга топширилди, бу эса номзодларнинг харажатларини сезиларли даражада камайтирди.
Мавзуга доир: Килиан Мбаппе Токио Олимпиадасида қатнашишдан воз кечди
Аввалроқ Япония ҳукумати Токио—2020 Олимпия ўйинларини чет эллик томошабинларсиз ўтказишга қарор қилгани маълум бўлди. Чет эллик томошабинларга сотиб олинган чипталар пули қайтарилади.
2024 йилда Олимпия ўйинлари Парижда, 2028 йилгиси эса АҚШнинг Лос-Анжелес шаҳрида ўтказилади.
Изоҳ (0)