Пандемия бошидан бери то 2 апрель, жума кунига қадар бутун дунёда коронавирус билан касалланиш бўйича 129 737 943 та ҳолат қайд этилди. Бу ҳақда Американинг Жонс Ҳопкинс университети маълумотларида келтирилган.
Университет маълумотларига кўра, дунё бўйлаб COVID-19 билан касалланиш оқибатидаги ўлим сони 28 298 632 тага ўсган, 104 миллионга яқин бемор касалликдан тузалган.
АҚШ касалланганлар ва вафот этганлар сонининг кўплиги бўйича етакчи бўлиб қолмоқда. Мамлакатда 30 миллион 540 минг кишида COVID-19 аниқланган, 553 140 та ўлим қайд этилган. Беморларнинг 23 миллионга яқини соғайган.
Вирусга чалинганлар сони бўйича дунёда иккинчи ўринда Бразилия турибди. Мамлакатда пандемия бошидан бери 12 839 844 киши инфекцияни юқтириб олган, шулардан 325 284 нафари вафот этган, 11 миллиондан ортиғи касалликдан соғайган.
Жаҳон соғлиқни сақлаш ташкилоти (ЖССТ) Бразилияни коронавирус эпицентрига айланган мамлакат деб эълон қилди. Ташкилот эпидемиологи Мария ван Керховнинг сўзларига кўра, Бразилия коронавирус билан боғлиқ ўта оғир вазиятни бошдан кечирмоқда, мамлакат шифохоналари COVID-19 билан оғриган беморларга лиқ тўла.
Шунингдек, Украинада бир суткада COVID-19’га чалинганлар сони рекорд даражага етди. Украина Соғлиқни сақлаш вазирлигининг хабар беришича, мамлакатда ўтган бир кеча-кундузда инфекцияни юқтириш бўйича 19 893 та янги ҳолат қайд этилган.
Украина Миллий хавфсизлик ва мудофаа кенгаши кузатув тизимининг маълумотларига кўра, бу пандемия бошидан бери кузатилган энг юқори суткалик кўрсаткич бўлиб, ундан аввалги антирекорд 26 март куни қайд этилган эди (18 132 та ҳолат).
«Украинада 2021 йил 2 апрель ҳолатига кўра, COVID-19’га чалиниш бўйича 19 893 та янги ҳолат аниқланди. Хусусан, 834 нафар бола ва 484 нафар тиббиёт ходими инфекцияни юқтириб олган», - деди соғлиқни сақлаш вазири.
Вазирнинг таъкидлашича, ўтган кун давомида 5040 киши касалхонага ётқизилган, 433 та ўлим қайд этилган ва 10 287 киши касалликдан соғайган. Ўтган кун давомида 19 097 киши коронавирусга қарши эмланиб, вакцина олганларнинг жами сони 268 минг кишини ташкил қилган.
Умумий ҳисобда пандемия бошланганидан бери Украинада 1 миллион 711 минг киши инфекцияга чалинган, улардан 33 679 нафари вафот этган ва 1 миллиондан ортиғи соғайган. Мамлакатда вирус юқтириш ҳолатларининг энг кўпи Лвов (1668), Одесса (1608), Харков (1494), Хмелн (1351) ва Днепропетр (1178) вилоятларида қайд этилган.
Маълумот учун, дунё бўйлаб вирусга чалинганларнинг умумий сони 16 мартда 120 миллиондан, 7 февраль куни 105 миллиондан, 13 февраль куни 108 миллиондан, 18 февраль куни 110 миллиондан ошганди.
Изоҳ (0)