Жаҳон соғлиқни сақлаш ташкилоти пандемия шароитида Рамазон ойини ўтказиш бўйича тавсиялар берди

Ушбу баҳорда мусулмонлар, насронийлар ва яҳудийлар Пасха, Пейсах ва Рамазон каби диний байрамларни нишонлайди. Жаҳон соғлиқни сақлаш ташкилоти (ЖССТ)нинг Европадаги бюроси, иймон ва у билан боғлиқ ижобий ҳис-туйғулар кишиларнинг психологик ҳолатига, айниқса, пандемиядан чарчаган ҳозирги пайтда ижобий таъсир кўрсатишини тан олади. Шу билан бирга, ҳали эмлаш якунига етмагани ва вируснинг хавф даражаси камаймагани сабабли ЖССТ мутахассислари эҳтиёт чораларини кўриш лозимлигини таъкидламоқда.

Коронавирусга чалиниш бўйича янги ҳолатларнинг ўсиб бораётганини ҳисобга олсак, байрамлар, оммавий йиғилиш ва саёҳатлар вирус тарқалишини тезлаштириши ва янги эпидемияларни келтириб чиқариши мумкинлиги сир эмас. Айни пайтда диний раҳбарлар оммавий тантаналарни ўтказиш бўйича қарор қабул қилишда ижобий ва салбий томонларни кўриб чиқмоқда. ЖССТ касалланиш даражаси ошган мамлакатларда байрамларни бекор қилиш мақсадга мувофиқ деб ҳисобламоқда.

Бироқ мутахассисларнинг фикрига кўра, қайси давлатда бўлишидан қатъи назар, барча тадбирлар очиқ ҳавода ўтказилиши, иштирокчилар сони ва давомийлиги чекланиши, шунингдек, кишилар оралиқ масофани сақлаш, қўллар гигиенасига риоя қилиш ва ниқоб тақиш қоидаларига амал қилиши керак. Байрамларни тор доирада, оила аъзолари билан нишонлаш мақсадга мувофиқдир.

ЖССТ оммавий тадбирларнинг ёпиқ жойларда нишонланиши бир том остида яшамайдиган ва ягона эпидемиологик қоидаларга риоя қилмайдиган турли авлод вакиллари йиғилганда, айниқса, хавф туғдиришини таъкидлади. Бундай ҳолатларда касаллик юқтириш хавфини камайтириш учун хонани тез-тез ва яхшилаб шамоллатиш ҳамда маҳаллий ҳокимиятнинг бошқа тавсияларига амал қилиш керак.

Саёҳат ҳақида гап кетганда, мутахассислар жамоат транспортидан, хусусан, гавжумликдан узоқ юришни маслаҳат беради. Ушбу саёҳат қай даражада зарур экани, уни кейинга қолдириш мумкинми ёки йўқлигини аниқлаштириш керак. Бундан ташқари, ЖССТ кўпгина мамлакатларга фақат COVID-19 тестининг салбий натижаси бўлган тақдирда кириш мумкинлиги, бошқаларда эса карантиндан ўтиш талаб қилинишини эслатиб ўтди. Мутахассислар маҳаллий ҳокимият томонидан киритилган барча қоидаларга қатъий риоя қилишга чақирмоқда.

«Гарчи бу йилги байрамлар, одатдагидан фарқ қилса-да, уларни барча эҳтиёт чораларига риоя қилган ҳолда нишонлаш орқали ўзингиз ва яқинларингизни вирусдан ҳимоя қилишингиз мумкин», — дея хулоса қилди ЖССТ.