Сувайш каналини бир ҳафтага тўсиб қўйган Ever Given кемасининг эгаси ишни судга оширмаслик ва муроса битими тузиш учун товон пули тўламоқчи. Бу ҳақда Миср президентининг денгиз портлари ва Сувайш каналини ривожлантириш бўйича маслаҳатчиси адмирал Мохаб Мамишга таяниб, «РБК» хабар берди.
«Йўқ, вазият суд жараёнига етиб бормайди, кеманинг эгаси муроса битими тузиб, товон тўламоқчи», — деди Мамиш ва воқеа юзасидан текширувлар катта эҳтимол билан бир ҳафта ичида якунланишини қўшимча қилди.
Расмийнинг сўзларига кўра, кема эгасининг Сувайш каналини тўсиб қўйгани учун ихтиёрий равишда товон тўлаши кема капитанининг ҳибсга олиниши ва унга нисбатан тегишли қонуний чоралар қўлланилишининг олдини олади.
Шунингдек, Мамиш Ever Given туфайли каналнинг кириш қисмида тўхтаб қолган кемалар эгаларига суғурта компаниялари томонидан компенсация тўланишини таъкидлади.
Willis Re International суғурта воситачисига асосланиб, Reuters Сувайш каналининг тўсиб қўйилиши йирик суд жараёнлари ва денгиз суғуртаси ставкаларининг кўтарилишига олиб келиши мумкинлигини айтган эди. Fitch рейтинг агентлиги суғурталовчиларга қарши даъволар юзлаб миллион еврога етиши мумкинлиги ҳақида хабар берган.
Аввалроқ Сувайш каналининг тўсилиб қолиши оқибатида етган зарар 1 млрд долларга баҳоланган эди. «Бу ҳақли равишда давлатга тегишли маблағ», — деб қўшимча қилган канал маъмурияти раҳбари.
Allianz нашри Сувайш каналининг тўсилиб қолишидан жаҳон савдосига етказилган зарарни ҳафтасига 6-10 миллиард доллар, деб баҳолаган.
Шунингдек, кемалар қатнови бўйича Lloyd’s List компанияси ҳисоб-китобларига кўра, Сувайш каналида саёзликка тиқилиб қолган Ever Given контейнер ташувчи кемаси томонидан кемалар йўлининг тўсиб қўйилиши жаҳон савдосига соатига 400 миллион долларга тушаётган эди. Мисрнинг Ever Given билан боғлиқ вазиятдан кўраётган талафоти кунига 14 миллион долларга баҳоланган.
Эслатиб ўтамиз, 23 март куни Ever Given кемаси кучли шамол ва қум бўрони туфайли йўналишини ўзгартириб, бурун ва қуйруқ қисмлари билан иккала қирғоққа тиралиб қолиб, Сувайш каналининг бир магистралли жанубий қисмини тўсиб қўйган эди. Бунинг натижасида 450 дан ортиқ кемадан иборат тирбандлик юзага келган. Шунингдек, ҳодиса ортидан нефть нархи кескин ўсган.
Сувайш канали орқали икки йўналишда ҳам кемалар ҳаракати 29 март, душанба оқшомидан қайта тикланди. Сувайш канали маъмуриятининг яна бир раҳбари, Миср президенти маслаҳатчиси Мохаб Мамиш каналнинг тўсилиб қолишида Ever Given кемаси капитанини айбдор қилди.
Изоҳ (0)