Тайванда рельсдан чиқиб кетиб, ҳалокатга учраган поезднинг ичида 496 киши бўлган, улардан 146 нафари жароҳат олган, 51 киши, жумладан, Франция фуқароси вафот этган. Бу ҳақда Тайван транспорт ва коммуникациялар вазирининг ўринбосари Ван Госай 2 апрель куни ўтказилган матбуот анжуманида маълум қилди, деб ёзмоқда «РИА Новости».
«Поездда 496 киши, хусусан, 492 йўловчи, машинист, машинист ёрдамчиси, фаррош ва поезд менежери бўлган», — деди Ван Госай.
Унинг сўзларига кўра, «ҳалок бўлганларнинг якуний тасдиқланган сони 51 кишини ташкил этади, улар орасида бир нафар Франция фуқароси, машинист, машинист ёрдамчиси бор, 146 нафар жароҳат олганларга керакли ёрдам кўрсатилмоқда, баъзилари уйига кетган».
Аввалроқ ТВБС телекомпанияси ҳодиса оқибатида тахминан 54 киши ҳалок бўлгани ва 156 киши жароҳат олгани, шунингдек, воқеа содир бўлган пайтда поездда 350 га яқин одам бўлгани ҳақида хабар берган.
Эслатиб ўтамиз, Тайваннинг Хуалян уездида 2 апрель куни маҳаллий вақт билан 09:28 (Тошкент вақти билан 06:28)да йўловчи поезди изидан чиқиб кетди. Тайван шимолидаги Синбей шаҳридан оролнинг жануби-шарқидаги Тайдунг томон кетаётган Taroko Express поездида саккизта вагон бор эди. Учинчисидан охиригача туннел ичида қолган вагонлар қидирув-қутқарув ишларига қийинчилик туғдирди.
«Пинго жибао» нашри ёзишича, дастлабки маълумотларга қараганда, рельсга 20 метр баландликдан қияликка нотўғри парковка қилинган юк машинаси тушиб кетган, унинг тормозлари носоз бўлган.
Reuters ушбу темир йўл ҳалокатини Тайванда сўнгги 40 йил ичидаги энг йириги деб атамоқда. Сўнгги марта Тайванда йирик темир йўл ҳалокати 2018 йил октябрида содир бўлган, ўшанда Puyuma Express тезюрар поезди Илан уездида изидан чиқиб кетган эди. Оқибатда 22 киши ҳалок бўлган, 170 дан ортиқ одам жароҳат олган эди. 1981 йилда поезд ҳалокати оқибатида 31 киши қурбон бўлганди.
Изоҳ (0)