Туркия президенти Эрдўғон Рамазон ойидан кейин Тоғли Қорабоғга боришини айтди

Туркия президенти Ражаб Тоййиб Эрдўғон Рамазондан кейин (май ойида) Тоғли Қорабоғдаги Шуша шаҳрига ташриф буюриш нияти борлигини маълум қилди. Бу ҳақда у Туркий тилли давлатлар ҳамкорлик кенгашининг норасмий саммитида айтиб ўтди, деб ёзади «РБК».

«Туркийзабон мамлакатлар томонидан Қорабоғдаги туркий ёдгорликларни ҳимоя қилиш ва қайта тиклашда Озарбайжонни қўллаб-қувватлаш муҳим аҳамиятга эга. Умид қиламанки, тез орада Рамазон байрамидан сўнг биз Шушага ташриф буюрамиз, бу биз учун яна бир байрамга айланади», —  деди Туркия раҳбари.

Таъкидланишича, Эрдўғон Шушага Озарбайжон президенти Илҳом Алиев билан бирга келиш ниятидалигини билдирган.

Туркий тилли давлатлар ҳамкорлик кенгашининг видеоанжуман шаклида ўтган норасмий саммити 31 март, чоршанба куни бўлиб ўтган эди. Унда Ўзбекистон Президенти Шавкат Мирзиёев ҳам иштирок этди. Тадбирда ташкилот доирасида иқтисодиёт, савдо, транспорт соҳаларидаги кўп қиррали амалий ҳамкорликни ҳамда маданий-гуманитар алоқаларни мустаҳкамлаш масалалари юзасидан фикр алмашилди.

Маълумот учун, Тоғли Қорабоғдаги Шуша шаҳри 2020 йил ноябрида Озарбайжон назорати остига ўтди. Арманистон кучлари томонидан шаҳарнинг қўлдан берилиши кузда авж олган можаронинг сўнгги воқеаларидан бири бўлди. Шуша стратегик мавқега эга шаҳар бўлиб, Тоғли Қорабоғ пойтахти Степанакертдан 10 км жанубда жойлашган. Степанакертни Арманистон билан боғловчи йўл мазкур шаҳардан ўтади. 90 йилларнинг бошида кечган Қорабоғдаги биринчи уруш пайтида шаҳар жиддий зарар кўрган. Ҳозирги кунда Шуша аҳолиси 4 минг кишидан сал кўпроқ.

Шуша вайрон қилинганидан сўнг  дарҳол Москва воситачилигида Ереван ва Боку можарони тўхтатиш тўғрисида келишувга эришди. Унга мувофиқ Тоғли Қорабоғнинг муҳим қисми Озарбайжон ҳарбийлари назорати остига ўтди ва тинчлик шартномасига риоя этилишини назорат қилиш Россия тинчликпарвар кучларига топширилди. Қўшма кузатув маркази ишида бир неча ўнлаб туркиялик ҳарбийлар ҳам иштирок этмоқда. Илҳом Алиев Озарбайжонга тажовуз қилинса, Туркиядан ҳарбий ёрдам сўрашга тайёрлигини маълум қилган.

Эслатиб ўтамиз, 2020 йилнинг декабрь ойида Тоғли Қорабоғдаги урушда Арманистоннинг қарийб 3 минг ҳарбийси ҳалок бўлгани маълум қилинди. Озарбайжон Мудофаа вазирлиги эса декабрь ойининг бошида жанговар ҳаракатлар давомида 2783 нафар ҳарбий хизматчи ҳалок бўлгани, яна 100 нафардан ортиқ ҳарбий хизматчи бедарак йўқолган деб ҳисобланаётгани ва госпиталларда 1245 нафар ҳарбий даволанаётганини маълум қилганди.