Coca-cola Ichimligi Uzbekistan, Ltd МЧЖ устав капиталидаги давлат улушини сотиш жараёнининг навбатдаги босқичи якунланди. Бу ҳақда Давлат активларини бошқариш агентлиги хабар берди.
Маълум қилинишича, Давлат тендер комиссиясининг қарорига мувофиқ, давлат улушини сотиш жараёнининг иккинчи босқичига ўтказилган талабгорлар билан Давлат активлари агентлиги ҳамда Coca-cola Ichimligi Uzbekistan ўртасида ахборотни ошкор этмаслик тўғрисида битимлар имзоланган.
Давлат улушини сотиш бўйича молиявий маслаҳатчи – Rothschild & Cie инвестиция банки томонидан талабгорларга иккинчи босқич юзасидан жараён хати юборилиб, Coca-cola Ichimligi Uzbekistan’нинг 2017, 2018 ва 2019 йиллардаги молиявий ҳисоботлари, бизнес режаси ҳамда фаолиятининг молиявий, солиққа оид, ташкилий ва ҳуқуқий жиҳатлари батафсил баён этилган ҳисоботлар тақдим этилган.
Таъкидланишича, бугунги кунда, талабгорлардан Coca-cola Ichimligi Uzbekistan, Ltd’ни сотиб олиш бўйича мажбурий бўлмаган (индикатив) таклифлар келиб тушган.
Мазкур таклифлар Rothschild & Cie инвестиция банки ва Dentons юридик фирмаси билан биргаликда ўрганиб чиқилиб, Давлат тендер комиссиясининг қарори билан навбатдаги босқичга ўтказилган.
«Айни пайтда, талабгорлар фойдаланиши учун Давлат активлари агентлиги томонидан КПМГ халқаро аудит компанияси ва Dentons юридик фирмаси билан биргаликда Coca-cola Ichimligi Uzbekistan’нинг молиявий, ҳуқуқий, ташкилий ва бошқа ахборотларини ўз ичига олган виртуал маълумотлар базаси яратилди», — дейилади хабарда.
Жараённинг мазкур босқичида талабгорларга виртуал маълумотлар базасидан фойдаланган ҳолда компанияга оид қўшимча ўрганишларни ўтказиш, унинг тақдимотида иштирок этиш, Coca-cola Ichimligi Uzbekistan, Ltd МЧЖ раҳбарияти билан мулоқот ҳамда савол-жавоблар сессияси учун имконият берилади.
Мавзуга доир: Coca-Cola Uzbekistan’нинг давлат улушига талабгорлар аниқланди. Улар орасида Африка компаниялари ҳам бор
Ушбу компания давлат улушининг сотилиши бўйича кўрсатган шартлар орасида сотиб олувчи камида 7 йиллик тажрибага эга бўлиши, йиллик соф тушуми 200 миллион доллардан кам бўлмаслиги, алкоголсиз ичимликлар бўйича халқаро тажрибага эга бўлиши кабилар келтирилган. Бундай талаблар «ғолиб харидор олдиндан аниқ», деган шубҳалар пайдо қилган.
Декабрь ойида бош вазир ўринбосари Жамшид Қўчқоров Coca-Cola’нинг давлат улушини сотиб олиш учун 3 та таклиф тушганини, 70 миллион доллар беришга тайёр компания билан музокара бошланишини маълум қилганди. Январь ойи бошларида Туркиянинг Coca-Cola İçecek компанияси Coca-Cola’даги давлат улушини харид қилиш учун ариза бергани маълум бўлди.
Изоҳ (0)