Тошкент вилояти Тошкент туманида темир йўлнинг бутловчи қисмларини суғуриб олиб, сотиб юборган ўсмирлар аниқланди. Бу ҳақда ИИВ Транспортда хавфсизликни таъминлаш бош бошқармаси хабар берди.
Маълум қилинишича, 21 март куни 16 ёшли К.Ш. Келес шаҳрида компьютер ўйинхонасида ўйнаш учун пули тугаб қолгани сабаб темир йўл рельслари ёнига бориб, шу ерга ўрнатилган бир дона «УПМ24-4» умумий нархи қарийб 1,5 миллион сўмлик кабел муфталарини боғлаб турувчи қурилмани ердан суғуриб олган ва уни олиб кетмоқчи бўлган.
Лекин қутини ичидаги симлар унга халақит қилгани сабаб у симларни кесиб ташлаш ниятида шу яқин орада яшовчи таниши 17 ёшли У.К.дан ёрдам сўраган. Икки йигит болта билан темир йўл устига чиқиб «УПМ-4» қутини ҳамда умумий нархи 625 минг сўмлик бошқа бир қутини бузиб олган ва иккиламчи қора металларни қабул қилиб олиш пунктига борган. Пункт қоровули ушбу қурилмаларни 28 килограмм чиққанини ва нархи 41 минг сўм бўлишини, пулни эса эртаси куни беришини айтган.
Ушбу ҳолат бўйича «Келес» бекатида соҳавий хизмат ходимлари томонидан олиб борилган тезкор профилактик тадбир натижасида болаларнинг шахсига аниқлик киритилган.
Ҳозирда вояга етмаганларнинг қонуний вакилларига нисбатан Маъмурий жавобгарлик тўғрисидаги кодекснинг 47-моддасига (болаларни тарбиялаш ва уларга таълим бериш борасидаги мажбуриятларни бажармаслик) асосан ҳужжатлар расмийлаштирилиб, қонуний чора кўриш учун Тошкент вилояти вояга етмаганлар ишлари бўйича идоралараро Тошкент тумани комиссиясига юборилган.
«Энди вояга етмаганларнинг ота-оналари фарзандлари томонидан «Тошкент сигналлаштириш ва алоқа дистанцияси» корхонасига етказилган салкам 950 минг сўм зарарни тўлаши ва Маъмурий жавобгарлик тўғрисидаги кодекснинг 47-моддасидаги ҳуқуқбузарлик юзасидан жавоб бериши керак бўлади», — дейилади хабарда.
Изоҳ (0)