БМТнинг Ўзбекистондаги доимий координатори Хелена Фрэйзер 28 март куни Тошкент марказида содир бўлган тартибсизликларга муносабат билдирди.
«Бутун дунёда бўлгани каби, Ўзбекистонда ҳам БМТ ҳар қандай шахсга нисбатан камситиш ва зўравонликнинг ҳар қандай кўринишини қоралайди. БМТ, шунингдек, тўғридан-тўғри толерантлик, инклюзивлик, ижтимоий хилма-хиллик ва инсон ҳуқуқларининг умумбашарий меъёрлари ва тамойилларининг бўлган нафрат ва адоват ифодаларининг ишлатилишини ҳам қоралайди.
БМТнинг Ўзбекистондаги жамоаси Ўзбекистон ҳуқуқни муҳофаза қилиш идораларини ҳафта охирида содир бўлган хавотирли воқеалар юзасидан холис текширув ўтказишга чақиради.
Шунингдек, биз оммавий ахборот воситалари, блогерлар ва фуқаролик жамиятини нафрат ва дискриминациянинг ҳар қандай кўриниши натижаси бўлган зўравонликка қарши курашга биргаликда ишлашга чақирамиз», — дейилади БМТ вакилининг баёнотида.
Бундан ташқари, содир бўлган воқеага хориж мамлакатларининг айрим элчилари Twitter орқали муносабат билдирган.
АҚШ элчиси Дэниэл Розенблюм қуйидагича ёзади: «Дам олиш кунлари Тошкент кўчаларида зўравонликни кўриш жуда хавотирли. Ўзбекистон ҳукуматини блогер Миразиз Бозоровнинг калтакланиши бўйича суриштирув ўтказишга чақираман».
«Дам олиш кунлари ўтказилган намойишларда шунча нафратни кузатиш жуда ачинарли. Биламан, бу жуда нозик масала. Бироқ турли хил жамият — бу кучли жамият. Толерантлик. Блогер/журналистларга зўравонлик қилишни оқлаб бўлмайди», — деб ёзади Буюк Британия элчиси Тим Торлот.
Эслатиб ўтамиз, Ўзбекистонда бир жинсли муносабатларнинг қонунийлаштирилишига қарши бўлган фаоллар 28 март куни ўз норозиликларини билдириш мақсадида Тошкент марказидаги Амир Темур хиёбони олдида тўпланганди. Кейинроқ Тошкент шаҳар ИИББ матбуот хизмати ЛГБТ фаолларига қарши норозилик ҳолатидан сўнг 12 киши ушланганини маълум қилди. Олий Мажлис Қонунчилик палатаси депутатлари Шербек Бўронов, Гулбаҳор Сайдғаниева ва Гулруҳ Агзамова сўнгги кунларда Тошкентда юз берган воқеаларга ўз муносабатларини билдирди. Депутат Алишер Қодиров ЛГБТ тарғиботига қарши «юмшоқ жазо»ни кучайтиришга, Расул Кушербаев эса провокаторларга чора кўришга чақирди. Кейинроқ ЛГБТ ҳуқуқларини ҳимоя қилган блогер Миразиз Бозоров ўз уйи олдида дўппослаб кетилгани маълум қилинди.
Изоҳ (0)