Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.
Туркияда дам олиш кунлари амал қиладиган комендантлик соати жорий қилинмоқда. Бу ҳақда мамлакат президенти Ражаб Тоййиб Эрдўғон маълум қилди. Чекловлар 12 апрелдан 12 майгача — Рамазон ойи давомида амал қилади.
Кафе ва ресторанлар таомларни фақат уйга олиб кетиш учун ишлайди. Ушбу муассасалар ишчилари учун ҳукумат манзилли кўмак тақдим этиб, чекловлар даврида ҳар бир киши учун 1,5 минг лира (180 доллар)дан тўланади.
Президент таъкидлашича, коронавирус билан касалланиш хавфининг энг юқори даражасини англатувчи қизил тоифага аллақачон 58 та шаҳар кирган, у ерларда Туркия аҳолисининг 80 фоизи истиқомат қилади.
«Агар беморлар ва ўлимлар сонини биз гуманитар ва тижорий алоқалар олиб борувчи мамлакатлардан кўра тезроқ қисқартира олмасак, глобал нормаллашув жараёнида ортда қолиб кетамиз», — деди Эрдўғон.
Туркияда баъзи йирик шаҳарларда, шу жумладан, Истанбул ва Измирда коронавирус пандемиясининг учинчи тўлқини бошлангани ҳақида ноябрь охирида маълум қилинган эди. Ўша пайтларда мамлакатда дам олиш кунлари амал қилувчи комендантлик соати киритилган эди. Шунингдек, Янги йил байрамлари даврида ҳам комендантлик соати эълон қилинган эди. Март бошида эса Туркияда баъзи чекловлар бекор қилинганди. Сайёҳлик мавсуми Туркияда апрель ойида очилиши режалаштирилмоқда.
Покистон президенти Ариф Алви Хитойнинг SinoPharm компанияси томонидан ишлаб чиқилган коронавирусга қарши вакцинанинг биринчи дозасини олганидан кейин COVID-19 билан касалланди. Унинг Twitter’да ёзишича, у вакцинанинг биринчи дозасини қабул қилган, аммо антитаналар иккинчи дозадан кейин ишлаб чиқарилишни бошлайди, иккинчи компонентни у бир ҳафтадан кейин олиши керак эди. Алви SinoPharm’нинг биринчи дозаси билан 15 март куни эмланган.
Аввалроқ Россия президенти Владимир Путин ҳам коронавирусга қарши вакцина олган эди. Март бошида давлат раҳбарларидан Украина президенти Владимир Зеленский коронавирусга қарши эмлангани, Ҳиндистон бош вазири Нарендра Моди коронавирусга қарши мамлакатда ишлаб чиқарилган COVAXIN вакцинасининг биринчи дозасини олгани, шунингдек, дунёнинг энг бадавлат кишиларидан бири, Berkshire Hathaway бош директори Уоррен Баффет Pfizer/BioNTech компаниясининг вакцинаси билан коронавирусга қарши эмлангани ҳақида хабарлар берилган.
Февраль ойида Туркия президенти Ражаб Тоййиб Эрдўғон унга коронавирусга қарши вакцинанинг иккинчи дозаси юборилганини маълум қилган, у вакцинанинг биринчи дозасини 14 январда қабул қилиб олганди.
Бундан аввал Шаҳзода Чарльз ва унинг рафиқаси, БМТ бош котиби, миллиардер Билл Гейтс, Аргентина президенти ҳамда Жанубий Корея президенти ва унинг рафиқаси коронавирус вакцинаси билан эмланган.
Исроил Соғлиқни сақлаш вазирлиги экспертлари ва шифокорлари коронавируснинг мамлакат ҳудудида пайдо бўлган янги штаммини аниқлади. Тадқиқот натижалари medRxiv сайтига жойланди. P681H деб ном берилган янги мутация намуналарининг 70 фоизи Исроилда, қолгани — Фаластин ва Буюк Британияда олинган. 2020 йил ноябридан 2021 йил январигача янги вариантни юқтириб олган жами 181 киши аниқланган.
P681H намуналари Исроилнинг тўққизта ҳудудида оқова сувларда аниқланган. Намуналар 2020 йил августидан 2021 йил январига қадар тўпланган, мутацияга учраган вирус излари эса уларда биринчи марта октябрда аниқланган.
Янги штамм вакциналарга нисбатан барқарор эмас ва касалликнинг оғирроқ кечишига олиб келмайди, деб ҳисоблайди мутахассислар. Янги мутация касалланиш ва касалхонага ётқизилиш кўрсаткичларига қандай таъсир қилиши ҳозирча номаълум, аммо уни ўрганиш давом этмоқда.
Исроил вакцинация суръатлари бўйича бошқа мамлакатларни ортда қолдирмоқда. 28 март ҳолатига, аҳолининг 52 фоизи эмланиб бўлган.
Аввалроқ Чехияда COVID-19’нинг янги штамми аниқланган эди. Мутахассисларнинг таъкидлашича, янги мутация коронавируснинг «британча» ёки Жанубий Африка штаммидан хавфли эмас. Ҳозирда янги штамм устида текширишлар олиб борилмоқда, деб хабар берган олимлар.
Шунингдек:
- Канада Иммунизация миллий маслаҳат қўмитаси 55 ёшдан ошган кишиларни эмлашда коронавирусга қарши AstraZeneca вакцинасидан фойдаланмасликни тавсия қилди. Ушбу огоҳлантириш Европада эмланганлар орасида тромбоз ҳолатларининг яна пайдо бўлаётгани билан боғлиқдир, аммо бундай ҳолатлар Канадада қайд этилмаган.
- Молдовада мансабдорларнинг навбатсиз эмланаётгани ҳақидаги хабарлар туфайли можаро юзага келди. Ўзгаришлар партияси етакчиси ижтимоий тармоқда ёзишича, баъзи ҳудудларда «VIP-вакцинация» бўлиб ўтмоқда: собиқ президент Игор Додоннинг Социалистлар партиясидан чиққан туман маслаҳатчилари ҳамда уларнинг яқинлари Pfizer вакцинаси билан эмланмоқда. Молдова президенти Майя Сандунинг маслаҳатчиси эмланишга ёзилган шифокорлар вакцина ололмаётгани ҳақида шикоят қилаётганини тасдиқлаган.
- Лондонда ўтган олти ой ичида биринчи марта бир кеча-кундузда коронавирус билан боғлиқ бирорта ҳам ўлим қайд этилмади. Таъкидланишича, ўтган йили апрелда, эпидемиянинг биринчи тўлқини авж олган пайтда, Лондонда ҳар куни COVID-19’га боғлиқ 230 га яқин ўлим кузатилар эди. 20 январь куни эса энг кўп ўлим қайд этилган — 1820 киши. Пандемия бошидан буён Лондонда 708 минг киши коронавирусни юқтириб олган, шуларнинг 15 минг нафари вафот этган.
Изоҳ (0)