So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.
Turkiyada dam olish kunlari amal qiladigan komendantlik soati joriy qilinmoqda. Bu haqda mamlakat prezidenti Rajab Toyyib Erdo‘g‘on ma’lum qildi. Cheklovlar 12-apreldan 12-maygacha — Ramazon oyi davomida amal qiladi.
Kafe va restoranlar taomlarni faqat uyga olib ketish uchun ishlaydi. Ushbu muassasalar ishchilari uchun hukumat manzilli ko‘mak taqdim etib, cheklovlar davrida har bir kishi uchun 1,5 ming lira (180 dollar)dan to‘lanadi.
Prezident ta’kidlashicha, koronavirus bilan kasallanish xavfining eng yuqori darajasini anglatuvchi qizil toifaga allaqachon 58 ta shahar kirgan, u yerlarda Turkiya aholisining 80 foizi istiqomat qiladi.
“Agar bemorlar va o‘limlar sonini biz gumanitar va tijoriy aloqalar olib boruvchi mamlakatlardan ko‘ra tezroq qisqartira olmasak, global normallashuv jarayonida ortda qolib ketamiz”, — dedi Erdo‘g‘on.
Turkiyada ba’zi yirik shaharlarda, shu jumladan, Istanbul va Izmirda koronavirus pandemiyasining uchinchi to‘lqini boshlangani haqida noyabr oxirida ma’lum qilingan edi. O‘sha paytlarda mamlakatda dam olish kunlari amal qiluvchi komendantlik soati kiritilgan edi. Shuningdek, Yangi yil bayramlari davrida ham komendantlik soati e’lon qilingan edi. Mart boshida esa Turkiyada ba’zi cheklovlar bekor qilingandi. Sayyohlik mavsumi Turkiyada aprel oyida ochilishi rejalashtirilmoqda.
Pokiston prezidenti Arif Alvi Xitoyning SinoPharm kompaniyasi tomonidan ishlab chiqilgan koronavirusga qarshi vaksinaning birinchi dozasini olganidan keyin COVID-19 bilan kasallandi. Uning Twitter’da yozishicha, u vaksinaning birinchi dozasini qabul qilgan, ammo antitanalar ikkinchi dozadan keyin ishlab chiqarilishni boshlaydi, ikkinchi komponentni u bir haftadan keyin olishi kerak edi. Alvi SinoPharm’ning birinchi dozasi bilan 15-mart kuni emlangan.
Avvalroq Rossiya prezidenti Vladimir Putin ham koronavirusga qarshi vaksina olgan edi. Mart boshida davlat rahbarlaridan Ukraina prezidenti Vladimir Zelenskiy koronavirusga qarshi emlangani, Hindiston bosh vaziri Narendra Modi koronavirusga qarshi mamlakatda ishlab chiqarilgan COVAXIN vaksinasining birinchi dozasini olgani, shuningdek, dunyoning eng badavlat kishilaridan biri, Berkshire Hathaway bosh direktori Uorren Baffet Pfizer/BioNTech kompaniyasining vaksinasi bilan koronavirusga qarshi emlangani haqida xabarlar berilgan.
Fevral oyida Turkiya prezidenti Rajab Toyyib Erdo‘g‘on unga koronavirusga qarshi vaksinaning ikkinchi dozasi yuborilganini ma’lum qilgan, u vaksinaning birinchi dozasini 14-yanvarda qabul qilib olgandi.
Bundan avval Shahzoda Charlz va uning rafiqasi, BMT bosh kotibi, milliarder Bill Geyts, Argentina prezidenti hamda Janubiy Koreya prezidenti va uning rafiqasi koronavirus vaksinasi bilan emlangan.
Isroil Sog‘liqni saqlash vazirligi ekspertlari va shifokorlari koronavirusning mamlakat hududida paydo bo‘lgan yangi shtammini aniqladi. Tadqiqot natijalari medRxiv saytiga joylandi. P681H deb nom berilgan yangi mutatsiya namunalarining 70 foizi Isroilda, qolgani — Falastin va Buyuk Britaniyada olingan. 2020-yil noyabridan 2021-yil yanvarigacha yangi variantni yuqtirib olgan jami 181 kishi aniqlangan.
P681H namunalari Isroilning to‘qqizta hududida oqova suvlarda aniqlangan. Namunalar 2020-yil avgustidan 2021-yil yanvariga qadar to‘plangan, mutatsiyaga uchragan virus izlari esa ularda birinchi marta oktabrda aniqlangan.
Yangi shtamm vaksinalarga nisbatan barqaror emas va kasallikning og‘irroq kechishiga olib kelmaydi, deb hisoblaydi mutaxassislar. Yangi mutatsiya kasallanish va kasalxonaga yotqizilish ko‘rsatkichlariga qanday ta’sir qilishi hozircha noma’lum, ammo uni o‘rganish davom etmoqda.
Isroil vaksinatsiya sur’atlari bo‘yicha boshqa mamlakatlarni ortda qoldirmoqda. 28-mart holatiga, aholining 52 foizi emlanib bo‘lgan.
Avvalroq Chexiyada COVID-19’ning yangi shtammi aniqlangan edi. Mutaxassislarning ta’kidlashicha, yangi mutatsiya koronavirusning “britancha” yoki Janubiy Afrika shtammidan xavfli emas. Hozirda yangi shtamm ustida tekshirishlar olib borilmoqda, deb xabar bergan olimlar.
Shuningdek:
- Kanada Immunizatsiya milliy maslahat qo‘mitasi 55 yoshdan oshgan kishilarni emlashda koronavirusga qarshi AstraZeneca vaksinasidan foydalanmaslikni tavsiya qildi. Ushbu ogohlantirish Yevropada emlanganlar orasida tromboz holatlarining yana paydo bo‘layotgani bilan bog‘liqdir, ammo bunday holatlar Kanadada qayd etilmagan.
- Moldovada mansabdorlarning navbatsiz emlanayotgani haqidagi xabarlar tufayli mojaro yuzaga keldi. O‘zgarishlar partiyasi yetakchisi ijtimoiy tarmoqda yozishicha, ba’zi hududlarda “VIP-vaksinatsiya” bo‘lib o‘tmoqda: sobiq prezident Igor Dodonning Sotsialistlar partiyasidan chiqqan tuman maslahatchilari hamda ularning yaqinlari Pfizer vaksinasi bilan emlanmoqda. Moldova prezidenti Mayya Sanduning maslahatchisi emlanishga yozilgan shifokorlar vaksina ololmayotgani haqida shikoyat qilayotganini tasdiqlagan.
- Londonda o‘tgan olti oy ichida birinchi marta bir kecha-kunduzda koronavirus bilan bog‘liq birorta ham o‘lim qayd etilmadi. Ta’kidlanishicha, o‘tgan yili aprelda, epidemiyaning birinchi to‘lqini avj olgan paytda, Londonda har kuni COVID-19’ga bog‘liq 230 ga yaqin o‘lim kuzatilar edi. 20-yanvar kuni esa eng ko‘p o‘lim qayd etilgan — 1820 kishi. Pandemiya boshidan buyon Londonda 708 ming kishi koronavirusni yuqtirib olgan, shularning 15 ming nafari vafot etgan.
Izoh (0)