Самарқанддаги хонадонларнинг бирида вақтинча яшаган 4 киши ис газидан заҳарланиб вафот этгани, шунингдек, яна бир киши кучли заҳарланиш аломатлари билан шифохонага ётқизилганди. Самарқанд шаҳар прокуратураси мазкур ҳолат бўйича жиноят иши қўзғатди.
Маълум қилинишича, ҳолат юзасидан Самарқанд шаҳар прокуратураси томонидан Жиноят кодексининг 259-моддаси (ёнғин хавфсизлиги қоидаларини бузиш) 2-қисми «а» банди билан жиноят иши қўзғатилиб, дастлабки тергов ҳаракатлари шаҳар ИИБ ТБ томонидан олиб борилмоқда.
Бундан ташқари, марҳумлар ишлаган уйининг эгаси Ф.Х. ички ишлар орган ходимларининг қонуний талабларини бажармагани ҳамда ходимларнинг ўз хизмат бурчини бажаришларига қаршилик кўрсатилгани ҳолати юзасидан Ф.Х.га нисбатан тегишли маъмурий баённома расмийлаштирилди.
Жиноят ишлари бўйича Самарқанд шаҳар судининг 2021 йил 29 март кунги қарори билан Ф.Х.га Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик) ва 195-моддаси (ички ишлар органлари ходимларининг ўз хизмат бурчларини бажаришларига қаршилик кўрсатиш) билан маъмурий қамоқ жазоси тайинланди.
«Kun.uz»нинг ёзишича, ис газидан заҳарланиб, ҳалок бўлганларнинг бири 1966 йилда туғилган, қолган уч нафари ўспирин, хусусан, улардан бири 2004 йилда туғилгани айтилмоқда.
Маълум бўлишича, тойлоқлик йигитлар 4 кун аввал шаҳарга ишлагани келиб, Лоҳутий кўчаси 31-уйда қурилаётган 3 қаватли уйнинг шифтини таъмирлай бошлаган. Уй эгасининг айтишича, аввалига йигитларга қатнаб ишлашни таклиф қилган, лекин улар ётиб ишласа, иш тез битишини айтиб, ётишга шароит қилиб беришни сўраган.
Ҳолат юзасидан «Мақсуд Шайхзода» маҳалласидаги «Анор» кафесида Самарқанд шаҳар ҳокими Бобурмирзо Облоқулов ва вилоят прокурори Равшан Машарипов иштирокида йиғилиш ўтказилган. Йиғилишда прокурор омон қолган бир йигитнинг аҳволи яхшиланиб бораётгани, унинг кўрсатмаси жараёнда ҳал қилувчи бўлишини маълум қилган.
Самарқанд шаҳар ҳокими Бобурмирзо Облоқулов ҳам йиғилиш давомида сўз олиб, ҳеч кимни одамлар олдида айбламоқчи эмаслигини, лекин 4 киши ўлиб кетгач, бунга жим қараб ҳам бўлмаслигини айтган. Облоқулов шаҳарда кўплаб қурувчилар ишчиларга яхши шароит яратиб бермаганини таъкидлаган.
Изоҳ (0)