Samarqanddagi xonadonlarning birida vaqtincha yashagan 4 kishi is gazidan zaharlanib vafot etgani, shuningdek, yana bir kishi kuchli zaharlanish alomatlari bilan shifoxonaga yotqizilgandi. Samarqand shahar prokuraturasi mazkur holat bo‘yicha jinoyat ishi qo‘zg‘atdi.
Ma’lum qilinishicha, holat yuzasidan Samarqand shahar prokuraturasi tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” bandi bilan jinoyat ishi qo‘zg‘atilib, dastlabki tergov harakatlari shahar IIB TB tomonidan olib borilmoqda.
Bundan tashqari, marhumlar ishlagan uyining egasi F.X. ichki ishlar organ xodimlarining qonuniy talablarini bajarmagani hamda xodimlarning o‘z xizmat burchini bajarishlariga qarshilik ko‘rsatilgani holati yuzasidan F.X.ga nisbatan tegishli ma’muriy bayonnoma rasmiylashtirildi.
Jinoyat ishlari bo‘yicha Samarqand shahar sudining 2021-yil 29-mart kungi qarori bilan F.X.ga Ma’muriy javobgarlik to‘g‘risidagi kodeksning 194-moddasi (ichki ishlar organlari xodimining qonuniy talablarini bajarmaslik) va 195-moddasi (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) bilan ma’muriy qamoq jazosi tayinlandi.
“Kun.uz”ning yozishicha, is gazidan zaharlanib, halok bo‘lganlarning biri 1966-yilda tug‘ilgan, qolgan uch nafari o‘spirin, xususan, ulardan biri 2004-yilda tug‘ilgani aytilmoqda.
Ma’lum bo‘lishicha, toyloqlik yigitlar 4 kun avval shaharga ishlagani kelib, Lohutiy ko‘chasi 31-uyda qurilayotgan 3 qavatli uyning shiftini ta’mirlay boshlagan. Uy egasining aytishicha, avvaliga yigitlarga qatnab ishlashni taklif qilgan, lekin ular yotib ishlasa, ish tez bitishini aytib, yotishga sharoit qilib berishni so‘ragan.
Holat yuzasidan “Maqsud Shayxzoda” mahallasidagi “Anor” kafesida Samarqand shahar hokimi Boburmirzo Obloqulov va viloyat prokurori Ravshan Masharipov ishtirokida yig‘ilish o‘tkazilgan. Yig‘ilishda prokuror omon qolgan bir yigitning ahvoli yaxshilanib borayotgani, uning ko‘rsatmasi jarayonda hal qiluvchi bo‘lishini ma’lum qilgan.
Samarqand shahar hokimi Boburmirzo Obloqulov ham yig‘ilish davomida so‘z olib, hech kimni odamlar oldida ayblamoqchi emasligini, lekin 4 kishi o‘lib ketgach, bunga jim qarab ham bo‘lmasligini aytgan. Obloqulov shaharda ko‘plab quruvchilar ishchilarga yaxshi sharoit yaratib bermaganini ta’kidlagan.
Izoh (0)