Вадим Абрамов: «Футболчиларимизнинг даражаси рақибникидан юқори эди, шунчаки мураббий омадсиз»

Ўзбекистон миллий терма жамоаси бош мураббийи Вадим Абрамов Ироққа қарши ўртоқлик ўйинидан (0:1) сўнг ўз фикрлари билан ўртоқлашди, деб хабар бермоқда «Championat.asia».

Ўйин ҳақида

Аввало, мухлислардан узр сўрамоқчиман, ноқулай об-ҳавога қарамасдан, бугун бизни қўллаб-қувватлаш учун анча мухлис йиғилганди. Ўйин яхши бўлди, рақиб ҳам ёмон эмас. Ғалаба қозонганингда, муаммолар кўзга ташланмайди. Ютқазсанг, бундан фойдали жиҳатларини топиш мумкин. Ўйлайманки, жамоамиз ёмон эмас, олдимизда турган вазифани бажаришга интиламиз. Ўзимизни оқлашдек туюлади, аммо Ироқ 23 март куни Тошкентга келган. Биласиз, биз 26 мартда Наманганда ўйин ўтказдик. Бу ҳам таъсирини кўрсатди. Таркибни ўзгартиришимиз ва бошқаларни майдонга туширишимиз мумкин эди, бироқ кўплаб мухлислар келишини инобатга олиб, легионерлар хизматидан фойдаландик ва мана шундай таркибни майдонга туширдик.

Ироқ терма жамоасига қарши алоҳида тактика ишлаб чиқилган ё чиқилмагани ҳақида

Ҳозирги ҳолатда тактика ҳақида гапириш қийин. Бугун рақиб тўлиқ ҳимояланган ҳолда қарши ҳужумда ўйнади. Улар астойдил тайёргарлик кўришгани сезилди. Агар биринчи бўлимда гол урганимизда, ҳаммаси бошқача бўлиши мумкин эди.

Жамоа кўп ҳужум қилгани, аммо якуний нуқтани қўядиган футболчи топилмаётгани ҳақида

Ахир, бу футбол. Сен урмасанг, сени жазолашади. Бугун ютқаза туриб ҳам ҳужум қилавердик ва вазиятни ўнглашга уриниб, гол ўтказиб юборишимиз мумкин эди. Бугунги хатолардан хулоса чиқариб, келажакда такрорламасликка ҳаракат қиламиз.

Элдор Шомуродов нега алмаштирилмагани ҳамда Игор Сергеев ва Шаҳзод Убайдуллаевнинг спорт формаси ҳақида

Сергеевда шунчаки жароҳат бор. Убайдуллаевни эса майдонга туширмадик, Шомуродов гол уришига ишондик ва мухлисларни хурсанд қилишини хоҳлагандик. Албатта, у гол уролмаганидан афсусда. Шуни ҳам айтиш керакки, Убайдуллаев ҳам яхши ҳужумчи.

Тактик тарафдан Сречко Катанецга (Ироқ терма жамоаси бош мураббийи) ютқазганини тан олиш ё олмаслиги ҳақида

Ҳа, шундай деса бўлади. Мен тактик томондан бугунги ўйинни ютқаздим. Футболчиларимиз даражаси рақибникидан юқори, шунчаки мураббий омадсиз.

Терма жамоанинг вазиятлардан фойдаланишда оқсаётгани ва креативлик етишмаётгани ҳақида

Биз кўп нарсани кўрсата олмаймиз, июнда расмий ўйинларимиз бор. Ҳозир махсус тайёргарлик жараёнини тўлиқ намойиш этишни хоҳламаймиз, чунки барча термалар ўз рақибларини ўрганади. Футболчиларга кўп нарсани очиқламаслигини ва эркин ўйнашларини тушунтирдим. Умид қиламанки, сиз ҳаммасини июнда кўрасиз.

Жамоага креатив ўйинчи етишмаётгани ва бўлажак расмий ўйинлардан олдин ҳозирги ҳолат қандайлиги ҳақида

Бундан олдин айтганимдек, ярим ҳимоячиларимиз марказий ҳимоячиларга кўмаклашди ва тўпни олиб қўйиб, вазият яратишга уринди. Бу вақтда марказий ҳимоячиларимиз шунчаки томоша қилиб турибди. Энди санаб кўринг, 6 киши тўпни олиб қўйишга ҳаракат қиляпти. Бизни 4 нафар ўйинчимиз эса олдинда рақибнинг 10 нафар футболчисига қарши ўйнаяпти. Бу нотўғри қарор. Буни ҳали таҳлил қилиб чиқамиз. Хавотир олманг, келажакда буни тўғрилаймиз, ҳаммаси яхши бўлади.

Бу ўйинда ҳам дарвозабоннинг қўпол хатога йўл қўйгани ҳақида

Ҳа, албатта муаммомиз бор. Ҳимоячилар ҳам ишончли ўйнашлари лозим. Бугун дарвозабонимиз ёмон ўйнамади, уни ёрқин келажак кутяпти, секин-аста тажриба тўплаб боради.