Наманганда 3 ёшли бола «Жигули» уриб кетиши оқибатида вафот этди. Бу ҳақда вилоят ИИБ матбуот хизмати хабар берди.
Қайд этилишича, воқеа 19 март куни соат 12:45 ларда шаҳарнинг Қ.Отамирзаев кўчасида юз берган. «Жигули» («ВАЗ-21011»)ни бошқариб кетаётган ҳайдовчи ҳаракат хавфсизлигини таъминлай олмай, йўлни кесиб ўтаётган 3 ёшли болани уриб юборган.
Болакай олган тан жароҳатлари оқибатида 25 март куни шифохонада вафот этган.
Ҳолат юзасидан шаҳар ИИО ФМБ ҳузуридаги тергов бўлими томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) билан жиноят иши қўзғатилган.
Аввалроқ Наманганда Isuzu юк машинаси пиёдани уриб юборгани, жабрланувчи шифохонада вафот этгани ҳақида хабар берилган эди. Шунингдек, Қашқадарёда тўй куни куёвнинг отаси ва икки қариндоши ҳамда келиннинг холаси ЙТҲга учраб, ҳалок бўлгани, Тошкентда 60 ёшли аёл юк машинаси уриб кетиши оқибатида ҳалок бўлгани ҳақида маълум қилинганди.
Изоҳ (0)