Ўзбекистонда дарахт ва буталарни кесишга ўрнатилган мораторий муддати 2021 йил охиригача узайтирилганига қарамай, Қаршидаги истироҳат боғида кўп йиллик дарахтлар кесилгани аниқланди.
Қашқадарё вилоят Экология ва атроф-муҳитни муҳофаза қилиш бошқармаси инспекторлари томонидан 15 март куни соат 23:00 лар атрофида Қарши шаҳар Алишер Навоий номидаги истироҳат боғи ичидаги «Нуронийлар маскани»да Қарши шаҳар ҳокимлиги ҳузуридаги Ободонлаштириш бошқармаси бир гуруҳ ходимлари кўп йиллик ҳар хил турдаги дарахтларни мотоарра ёрдамида кесиб, трактор тиркамаларига ортаётгани аниқланган.
Ҳолат юзасидан ҳуқуқбузарларга тушунтириш ишлари олиб борилган ва қонуний тўхтамга келгунга қадар мотоарралар олиб қўйилган.
Аммо тушунтириш ишларига қарамай, 22 март куни тунги соат 00:10 лар атрофида Қарши шаҳар ҳокимлиги ҳузуридаги Ободонлаштириш бошқармаси бир гуруҳ ходимлари Қарши шаҳар ҳокими ўринбосарининг назорати остида ушбу ҳудуддаги қолган кўп йиллик ҳар хил турдаги дарахтларни мотоарра ёрдамида кесаётгани аниқланган.
Инспекторлар томонидан юқорида келтирилган иккала ҳолат атрофлича ўрганилиб, мораторий даврида ҳам сақлаб қолишни имкони бўлмаган 14 дона кўп йиллик дарахт диаметрлари ўлчанганда табиатга келтирилган зарар 58 милллион 677 минг 500 сўм эканлиги аниқланган.
Қайд этилишича, ҳар икки аниқланган ҳолат бўйича ваколат доирасида тегишли ҳужжатлар расмийлаштирилмоқда.
Эслатиб ўтамиз, Шавкат Мирзиёевнинг 3 февралдаги фармони билан Ўзбекистонда дарахт ва буталарни кесишга ўрнатилган мораторий муддати 2021 йил охиригача узайтирилган. Шунингдек, дарахтларни ноқонуний кесганлик учун жарима миқдори икки бараварга оширилган.
Аввалроқ Қарши туманида 71 та мевали дарахт ўзбошимчалик билан қўпориб ташланиши оқибатида табиатга салкам 28 миллион сўм зарар етказилгани ҳақида хабар берилган эди.
Изоҳ (0)