Тошкент вилоятидаги «Амирсой» сиҳатгоҳига олиб борувчи йўлда чўкиш ҳолати кузатилгани сабаб автомобиллар ҳаракати вақтинча тўхтатилди, деб хабар беради ИИВ ЙҲХББ ахборот хизмати.
Маълум қилинишича, «Амирсой» сиҳатгоҳига олиб борувчи Бўстонлиқ тумани ҳудудидан ўтган йўлнинг 3-километрида, 19-20 пикетида йўл чўкиш ҳолати кузатилган. Шу сабабли айни вақтда зудлик билан ФВВ ва бошқа идоралар ҳамкорлигида тезкор чоралар кўрилмоқда.
Таъкидланишича, транспорт воситалари ҳаракати ушбу автомобиль йўлида вақтинча тўхтатилган. Дам олишга борувчилар туман ҳудудидан ўтган 4Р-6 Тошкент—Чимён автомобиль йўлининг 72-километрида ортга қайтарилмоқда.
Йўл созлаш ишлари амалга оширилиб, ҳаракат тикланганидан сўнг қўшимча маълумот берилади.
«Амирсой» тоғ-чанғи курорти иши қор кўчкилари сабаб вақтинчалик тўхтатилгани тўғрисида хабар берилганди.
Маълумот учун, «Амирсой» тоғ-чанғи курорти мажмуаси 2019 йил 21 декабрь куни Тошкент вилояти Бўстонлиқ туманида очилган. Курорт лойиҳаси икки босқичда амалга оширилади. Биринчи босқич 2019 йилнинг IV чорагида битказилган, «Ғарбий Амирсой» деб номланган иккинчи босқичи 2022 йилнинг III чорагида битказилиши режалаштирилган.
Ушбу тоғ-чанғи курорти мажмуаси ҳудудида тюбинг, пиёда саёҳатлар, қорда юриш учун махсус турлар, чана ва квадратциклда учишларни ўз ичига олган кўнгилочар зона ва махсус болалар ўйин майдончаси учун алоҳида ҳудудлар ташкил этилган.
Изоҳ (0)