Зангиотадаги шифохонага ҳар куни 50-60 киши ётқизилмоқда — бош шифокор

Зангиота тумани Ихтисослаштирилган кўп тармоқли юқумли касалликлар шифохонасига ҳар куни 50-60 киши жойлаштирилмоқда. Бу ўртача кўрсаткич бўлиб, 2020 йилда 200 кишини ташкил этган, дейди мазкур тиббиёт муассасасининг иккинчи кластери бош шифокори Дониёр Миразимов «Ўзбекистон 24» телеканалига берган интервьюсида.

«Ижтимоий тармоқларда вазиятнинг оғирлиги, шифохоналарда жой етишмаслиги, жонлантириш бўлимлари тўлиб кетгани ҳақидаги видео ва аудио ёзувлар тарқалди. Касалланиш маълум даражада ошмоқда, лекин вазият кескин эмас. Ваҳима учун ҳеч қандай сабаб йўқ. Июль ва сентябрь ойларида энг катта авж олиш кузатилган бўлиб, бир кунда 200 нафар беморни қабул қилганмиз. Ҳозир эса ўртача 50-60 киши келяпти. Фарқини кўришингиз мумкин», — дейди у.

Унинг сўзларига кўра, Зангиота шифохонасининг жонлантириш бўлимида 177 та койка-ўрин ташкил қилинган бўлиб, бугунги кунда 40 га яқини бўш турибди.

«Вазият хавотирли, бироқ ваҳима қилишга асос йўқ. Фуқароларимиздан бир нарсани илтимос қилмоқчиман. Коронавирус йўқолгани йўқ, у ёнимизда. Ўзбекистонда касаллик йўқолгани хусусида миш-миш юрибди. Лекин у бор. 9 мартдан кейин ўсиш кузатилмоқда. Бу катта ўсиш бўлмаса-да, айни пайтда санитария-эпидемиология қоидаларига риоя қилиш керак. Одамлар тинчланиб, коронавирусдан қўрқмай қўйди. Ноябрь—март ойларида беморлар сони кескин камайган эди. Кунига 15-20 нафар беморни қабул қилганмиз», — дея қайд этади Дониёр Миразимов.

Маълум қилинишича, ҳозирда шифохонада коронавирус билан касалланган 700 га яқин бемор даволанмоқда. Шифохонада жами 2 мингта жой мавжуд бўлиб, шундан 1300 таси бўш ва беморларни қабул қилишга шай ҳолатда.

Эслатиб ўтамиз, 14 март куни Ўзбекистонда декабрдан бери биринчи марта бир кунда 100 дан ортиқ одамда коронавирус аниқланиб, шундан 93 таси Тошкент шаҳрида қайд этилганди. Пойтахтда коронавирусга чалиниш ҳолатлари, асосан, ўқувчилар, талабалар ва ташкилот ходимлари орасида кўпайган. Хусусан, Тошкентдаги 77 та мактабда ўқувчилар орасида коронавирус инфекцияси аниқланган, 117-сонли боғчада икки нафар тарбиячи ва болаларда коронавирус аниқлангани сабаб мазкур боғча вақтинча ёпилди.

Шунингдек, Ўзбекистонда 1 апрелдан оммавий тадбирлар ўтказишга айрим чекловлар ўрнатилади. Тўйларда меҳмонлар сони чекланади.