Ўзбекистон Президентининг «Аҳоли ва тадбиркорлик субъектларига давлат хизматларидан фойдаланишда янада қулай шароитлар яратиш, бу борада бюрократик тўсиқларни қисқартириш бўйича қўшимча чора-тадбирлар тўғрисида»ги фармони қабул қилинди, деб хабар бермоқда «Халқ сўзи online».
Фармонга асосан, Ички ишлар вазирлиги, Мудофаа вазирлиги, Ташқи ишлар вазирлиги, Соғлиқни сақлаш вазирлиги, Бандлик ва меҳнат муносабатлари вазирлиги, Давлат солиқ қўмитаси, Давлат персоналлаштириш маркази ва Молия вазирлиги ҳузуридаги бюджетдан ташқари Пенсия жамғармаси 2021 йил 1 майга қадар ўзларининг ахборот тизимларини «ФҲДЁнинг ягона электрон архиви» ахборот тизимига интеграция қилишни таъминлайди.
Бунда жисмоний шахснинг ўлими қайд қилинган кундан бошлаб 10 кун ичида:
- Ички ишлар вазирлиги — вафот этган шахснинг фуқаролик паспорти ёки ID-картаси, шунингдек, Ўзбекистон ҳудудида доимий яшовчи чет эл фуқаролари ва фуқаролиги бўлмаган шахсларнинг яшаш гувоҳномалари, фуқаролиги бўлмаган шахсларнинг ҳаракатланиш ҳужжатлари, ҳайдовчилик гувоҳномалари ҳисобдан чиқарилишини, агар фуқаро қидирувда бўлса, қидирув ва жиноят-процессуал ишларига (ҳужжатларига) тегишли маълумотлар киритилишини;
- Мудофаа вазирлиги — вафот этган шахс ҳарбий рўйхатдан чиқарилишини;
- Ташқи ишлар вазирлиги – вафот этган чет эл фуқаролари ва чет элда доимий яшовчи фуқаролиги бўлмаган шахслар бўйича тегишли хорижий давлатга ёки унинг Ўзбекистондаги ваколатхонасига хабар берилишини;
- Соғлиқни сақлаш вазирлиги — вафот этган шахс ногиронлиги бўлган шахслар рўйхатидан чиқарилишини;
- Бандлик ва меҳнат муносабатлари вазирлиги — вафот этган шахс «Ягона миллий меҳнат тизими» идоралараро дастурий-аппарат комплекси ҳисобидан чиқарилишини;
- Давлат солиқ қўмитаси — солиқ қарзи мавжуд бўлмаган вафот этган шахс солиқ тўловчи сифатида рўйхатдан чиқарилишини;
- бюджетдан ташқари Пенсия жамғармаси — вафот этган шахснинг дафн маросими учун бир марталик нафақа тайинланишини ва унга бошқа турдаги пенсия ва нафақалар ҳисобланиши тўхтатилишини;
- Давлат хизматлари агентлиги — вафот этган якка тартибдаги тадбиркорнинг тадбиркорлик субъектларининг Ягона давлат реестрида фаолияти тугатилган мақомига ўтказилишини таъминлайди.
Эслатиб ўтамиз, «Дафн этишга нафақа тайинлаш ва тўлаш тартиби тўғрисида» низомга кўра, нафақа марҳумнинг эрига (хотинига), ота-онасига, фарзандларига ва бошқа қариндошларига ёки марҳумнинг қонуний вакилига, бундай шахс бўлмаган тақдирда эса — дафнни амалга ошириш мажбуриятини зиммасига олган бошқа шахсга пенсияни ҳисоблашнинг базавий миқдорининг тўрт баравари миқдорида тайинланар ва тўланар эди.
Аввалроқ Шавкат Мирзиёевнинг «Аҳоли ва тадбиркорлик субъектларига давлат хизматларидан фойдаланишда янада қулай шароитлар яратиш, бу борада бюрократик тўсиқларни қисқартириш бўйича қўшимча чора-тадбирлар тўғрисида»ги фармони билан Ўзбекистонда 18 турдаги маълумот ва ҳужжатнинг аҳоли ҳамда тадбиркорлардан талаб қилиниши бекор қилиниши, барча давлат, банк, ижтимоий ва бошқа хизматларни кўрсатишда фуқаро шахсини тасдиқловчи ягона идентификатор белгилангани ҳақида хабар берилган эди.
Изоҳ (0)