Наманган вилояти Давлатобод туманида наушник тақиб темир йўлда ҳаракатланган йигитни поезд уриб кетди. Бу ҳақда вилоят ИИБ ахборот хизмати хабар берди.
Маълум қилинишича, кўнгилсиз ҳодиса воқеа 21 март куни соат 11:40 атрофида Наманган шаҳар «Элобод» маҳалласи орқали ўтган Ровустон—Наманган темир йўл оралиғининг 88-километри 6-пикетида содир бўлган. «Ровустон» бекатидан «Наманган» бекатига ҳаракатланиб кетаётган Қўқон локоматив депоси машинисти бўлиб ишловчи 49 ёшли фуқаро тепловозни олтита вагон билан бошқариб кетаётган вақтида наушник тақиб, темир йўл изи бўйлаб кетаётган Давлатобод туманида яшовчи 19 ёшли йигитни уриб юборган.
Оқибатда фуқаро бош мия лат ейиши, жағ суягининг синиши, ўнг қўли лат ейиши ташхиси билан Республика шошилинч тиббий ёрдам илмий маркази Наманган филиалига ётқизилган.
Ҳозирда ушбу ҳолат бўйича суриштирув ҳаракатлари олиб борилмоқда.
Аввалроқ Тошкент вилоятида наушник тақиб, темир йўл бўйлаб ҳаракатланган икки аёлни поезд уриб кетгани ва улардан бири воқеа жойида вафот этгани тўғрисида хабар берилганди.
Изоҳ (0)