Коронавирус пандемияси сабабли 2020 йилнинг баҳоридан чегаралари ёпиқ бўлган Австралияда Биринчи жаҳон уруши давридан буён биринчи марта уч ой давомида аҳоли сонининг қисқариши қайд этилди. Бу ҳақда Австралия Статистика бюросининг демография масалалари бўйича директори Фил Браунингга таяниб «Интерфакс» хабар берди.
2020 йилнинг биринчи чорагида мамлакат аҳолиси 4200 нафарга камайиб, 25 693 059 нафарни ташкил қилган. 55 400 киши Австралиядан кўчиб кетди, 20 600 киши кўчиб келди.
Бунгача аҳоли сонининг камайиши Биринчи жаҳон уруши даврида, 1916 йилнинг охирги чорагида кузатилган, деб ёзмоқда Sydney Morning Herald. Ўшанда қитъа аҳолиси 51 500 нафаргача камайиб кетган.
Мутахассислар аҳоли сонининг қисқаришини муҳожирлар оқимининг камайиши ва туғилиш даражасининг пастлиги билан изоҳламоқда.
2019 йилнинг сентябрь ойида Австралия аҳолиси ўсишининг 63 фоизи муҳожирлар ҳисобига юз берган, 2020 йилда бу кўрсаткич 39 фоизгача тушиб кетди. Ҳалигача ёпиқ чегаралар муҳожирлар оқимининг янада пасайиш хавфини яратмоқда, чунки Австралияга кўчиб ўтишни истаганлар учун барча ҳужжатларни тўғри расмийлаштириш мураккаб ҳисобланади.
KPMG (Klynveld Peat Marwick Goerdeler — халқаро аудиторлик компанияси) иқтисодчиси Брендан Ринненинг маълум қилишича, Австралияга муҳожирларнинг соф оқими охирги 12 ой ичида деярли 65 фоизга камайди.
2020 йилда туғилиш даражаси 2,2 фоизга ёки 7000 нафарга қисқарди, мамлакатда 299 500 нафар бола туғилди. Бу сўнгги 11 йил ичидаги энг паст кўрсаткич ва бу туғилишнинг 24 йил ичидаги энг катта пасайиши. Мутахассислар туғилиш даражасининг пасайишини одамларнинг иқтисодиёт истиқболларига нисбатан ишончсизлиги билан изоҳлайди.
Worldometers ҳисоб-китобларига кўра, Австралияда пандемия бошланганидан буён коронавирус инфекциясига чалиниш билан боғлиқ 29 164 та ҳолат қайд этилган, 909 киши вирус қурбонига айланди.
Аввалроқ коронавирус пандемияси фонида 2020 йилда дунё бўйлаб глобал эркинлик даражаси пасайгани ҳақида хабар берилди. Ҳозирда дунё аҳолисининг 20 фоизидан камроғи «эркин» мамлакатларда, 38 фоизи «эркин бўлмаган» давлатларда яшайди.
Изоҳ (0)