Yevropa Ittifoqi mamlakatlarida aholining muntazam qarishi kuzatilyapti. 2020-yilda mintaqa aholisining 20,6 foizi kamida 65 yoshda, bu ko‘rsatkich o‘n yil oldingidan uch foizga ko‘proq. Bu haqda “Korrespondent.net” xabar berdi.
Foto: Le Journal
Yevroittifoqda Italiya (65 yoshdan oshganlar 23,2 foiz), Gretsiya va Finlyandiya (22,3 foiz), Portugaliya (22,1 foiz), Germaniya (21,8 foiz) va Bolgariya (21,6 foiz) keksa aholisi eng ko‘p davlatlar bo‘ldi. Shuningdek, Irlandiya (14,4 foiz) va Lyuksemburg (14,5 foiz) Yevroittifoqda aholisi eng yosh mamlakatlar sifatida e’tirof etildi.
Yevropa Ittifoqida demografik muammolar, xususan, keksayish va aholining qisqarishi rasman tan olingan. Yevrokomissiya 2020-yilning iyun oyida chiqargan “Demografik o‘zgarishlarning oqibatlari” (The Impact of Demografic Change) boyonotiga ko‘ra, 2070-yilga kelib Yevropa Ittifoqida mehnatga layoqatli yoshdagi odamlar soni 18 foizga qisqaradi, 65 va undan katta yoshdagi aholi ulushi esa 30,3 foizga yetadi. Shuningdek, Yevropa Ittifoqining jami aholisi global aholining ko‘pi bilan 4 foizini tashkil qiladi, 1960-yilda esa bu ko‘rsatkich 12 foiz edi.
Avvalroq Yevrostat 2100-yilga kelib har bir 65 yoshdan oshgan odamga salkam ikkitadan mehnatga layoqatli yoshdagi odam to‘g‘ri kelishini taxmin qilgan edi.
Shuningdek, Xitoyda o‘n to‘rtinchi besh yillik ijtimoiy-iqtisodiy rivojlanish rejasini (2021—2025) amalga oshirish jarayonida pensiya yoshi asta-sekin uzaytirib borilishi haqida xabar berilgan edi.
